ԱՄՆ նախագահ Դոնալդ Թրամփը Սպիտակ տանը լրագրողներին հայտնել է, որ կարող է «շատ լուրջ քայլեր» ձեռնարկել Կոլումբիայի դեմ՝ կապված թմրանյութերի ապօրինի շրջանառության մեջ նրա ենթադրյալ դերի հետ։
«Նա (նախագահ Գուստավո Պետրոն) ավազակ է և վատ մարդ։ Նա այն մարդն է, ով շատ թմրանյութեր է արտադրել։ Այսօրվանից մենք դադարեցրել ենք Կոլումբիային ուղղված բոլոր վճարումները»,- չորեքշաբթի օրը Սպիտակ տանը լրագրողներին ասել է Թրամփը։
Թրամփը նշել է, որ Պետրոն շատ վատ է գործել իր երկրի համար՝ պնդելով, որ այնտեղ կոկաինի գործարաններ կան։
«Մենք շատ լուրջ քայլեր կձեռնարկենք նրա և նրա երկրի դեմ։ Այն, ինչ նա արել է իր երկրում, մահվան թակարդ է դարձել»,- հավելել է Թրամփը։
«Ես կպաշտպանեմ ինքս ինձ»
Թրամփի հայտարարություններից կարճ ժամանակ անց Պետրոն արձագանքել է՝ նշելով, որ ինքը ԱՄՆ-ում իրավական ճանապարհով կպաշտպանի իրեն ամերիկյան նախագահի զրպարտություններից։
«ԱՄՆ տարածքում իմ դեմ հնչեցված զրպարտություններից, որոնք հնչել են բարձր պաշտոնյաների կողմից, ես կպաշտպանեմ ինքս ինձ ամերիկյան փաստաբանների միջոցով ամերիկյան արդարադատության համակարգում»,- ասել է Պետրոն X հարթակում։
«Ես միշտ կկանգնեմ Կարիբյան տարածաշրջանում իշխանության կողմից իրականացվող ցեղասպանությունների և սպանությունների դեմ»,- հավելել է նա։
Պետրոն նաև նշել է, որ Կոլումբիան կպայքարի թմրանյութերի ապօրինի շրջանառության դեմ, երբ իրենց օգնությունը պահանջվի՝ ընդգծելով, որ նրանք կաշխատեն այն պետությունների հետ, որոնք կցանկանան իրենց աջակցությունը։
«Երբ մեր օգնությունը պահանջվի թմրանյութերի ապօրինի շրջանառության դեմ պայքարում, ամերիկյան հասարակությունը այն կունենա»,- ասել է Պետրոն։ «Մենք կպայքարենք թմրանյութերի ապօրինի շրջանառողների դեմ այն պետությունների հետ, որոնք կցանկանան մեր օգնությունը»։
