Իրանի Ազգային անվտանգության բարձրագույն խորհրդի քարտուղար Մոհսեն Ռեզային ԱՄՆ նախագահ Դոնալդ Թրամփին կոչ է արել ընդունել այն «յոթ պայմանները», որոնց մասին Իրանը բազմիցս բարձրաձայնել է։

X հարթակում իր էջում հրապարակված հայտարարության մեջ Մոհսեն Ռեզային անդրադարձել է Իրանի հետ բանակցությունների վերաբերյալ Դոնալդ Թրամփի արտահայտած մտքերին։

Նշելով, որ Իրանի դեմ մղվող պատերազմն արդեն իսկ կործանել է ԱՄՆ կառավարությանը, մինչդեռ Վաշինգտոնը շարունակում է անօգուտ ճգնել՝ հուսահատ մոլախաղացի պես, Ռեզային կոչ արեց ԱՄՆ-ին՝ «հանձնվել»։

Անդրադառնալով Թրամփի այն հայտարարություններին, թե Իրանի հետ բանակցությունները լավ են ընթանում՝ Ռեզային բանակցությունները որակեց որպես «երևակայական», իսկ դրանց վերաբերյալ հաղորդումները՝ որպես «սուտ»։

Շարունակելով իր խոսքը՝ Ռեզային ասաց. «Հրաժարվե՛ք Արևմտյան Ասիայում նոր կարգի մերժումից։ Եկել է ժամանակը՝ ընդունելու այն յոթ պայմանները, որոնք Իրանը բազմիցս առաջ է քաշել»։

Սպիտակ տանը կայացած մամուլի ասուլիսում ԱՄՆ նախագահ Թրամփը հայտարարեց, որ Իրանի հետ քննարկումները լավ են ընթանում, հույս հայտնեց, որ գործընթացը շուտով կավարտվի, և նշեց, որ, իր կարծիքով, նոր ռազմական գործողության անհրաժեշտություն չկա։

Թեհրանի վարչակազմի կողմից Վաշինգտոնին ներկայացված յոթ պայմանների թվում են՝ ծովային շրջափակման վերացումը, Հորմուզի նեղուցով առևտրային և նավթային նավերի անվտանգ անցման երաշխավորումը, միակողմանի պատժամիջոցների չեղարկումը, նավթի արտահանման համար բացառությունների սահմանումը, ակտիվների ապասառեցումը, միջուկային նյութերը երկրի ներսում պահպանելը և պատերազմի դադարեցումը։