Ուկրաինայի նախագահ Վլադիմիր Զելենսկին մեղադրել է Ռուսաստանին Ուկրաինայում պատերազմը երկարաձգելու փորձերի մեջ և վերահաստատել է Կիևի համար անվտանգության ամուր երաշխիքների անհրաժեշտությունը։
«Այսօր մենք կրկին լսեցինք Մոսկվայից ազդանշաններ, որ նրանք պատրաստվում են շարունակել պատերազմը հաջորդ տարի», հավելելով, որ նման ազդանշանները հակասում են Ռուսաստանի պնդումներին՝ հակամարտությունը դադարեցնելու ցանկության մասին։ Ռուսաստանից եկող հռետորաբանությունն ու ազդանշանները ցույց են տալիս ճիշտ հակառակը, և դա դրսևորվում է նրանց բանակներին տրված պաշտոնական հրամանների տեսքով», - Telegram-ում հրապարակված տեսաուղերձում ասաց Զելենսկին
Զելենսկին ընդգծել է Ռուսաստանից «իրական պաշտպանության» անհրաժեշտությունը՝ ասելով, որ Ուկրաինան կշարունակի համագործակցել իր գործընկերների հետ անվտանգության, ֆինանսական և քաղաքական միջոցառումների շուրջ, այդ թվում՝ ռուսական ակտիվների վերաբերյալ քայլերի շուրջ։
Զելենսկին նշեցէ, որ հինգշաբթի օրը նախատեսված ԵՄ գագաթնաժողովում հնչեցվող ուղերձները պետք է Մոսկվային ցույց տան, որ պատերազմը, որը տևել է ավելի քան երեքուկես տարի, շարունակելը «անիմաստ է, քանի որ Ուկրաինան աջակցություն կստանա»։
«Սա ամբողջությամբ կախված է Եվրոպայից. Եվրոպան պետք է կատարի այս ընտրությունը», - ասաց նախագահը։
Նախագահը նաև հայտարարել է, որ ուկրաինացի պաշտոնյաները այս շաբաթ կշարունակեն բանակցությունները ԱՄՆ պատվիրակության հետ խաղաղության և անվտանգության երաշխիքների վերաբերյալ։
Հարձակումները շարունակվում են բանակցությունների մոտենալուն զուգընթաց
Ըստ Politico-ի՝ Զելենսկու խոսքերը հնչում են այն ժամանակ, երբ ԱՄՆ և Ռուսաստանի պատվիրակությունները, ինչպես սպասվում է, այս շաբաթավերջին կհանդիպեն Մայամիում՝ քննարկելու հնարավոր խաղաղության շրջանակը։
Ռուսական պատվիրակության կազմում, ինչպես սպասվում է, կլինի Կիրիլ Դմիտրիևը՝ նախագահ Վլադիմիր Պուտինի հատուկ բանագնացը, որը նախկինում մասնակցել է բանակցություններին։
ԱՄՆ նախագահ Դոնալդ Թրամփի հատուկ բանագնաց Սթիվ Վիտկոֆը և նրա փեսան՝ Ջարեդ Քուշները, վերջին շաբաթներին Գերմանիայում բանակցություններ են վարել ուկրաինացի և եվրոպացի պաշտոնյաների հետ, որտեղ քննարկվել են 20 կետից բաղկացած խաղաղության ծրագիր և տնտեսական հարցեր։ Ժնևում նախորդ բանակցությունները հանգեցրել են վերանայված շրջանակի նախագծի, որը հետագայում քննարկվել է Պուտինի հետ Մոսկվայում։
Միևնույն ժամանակ, տեղական պաշտոնյաների խոսքով, ռուսական հարձակումները շարունակվել են չորեքշաբթի օրը. առնվազն 32 մարդ վիրավորվել է հարավային Զապորոժիե քաղաքի և նրա հարակից տարածքների վրա հասցված ավիահարվածների հետևանքով։
Պաշտոնյաները հայտնել են, որ վիրավորների թվում հինգ երեխա կա, քանի որ հարձակումները հարվածել են բնակելի շենքերին և կրթական հաստատությանը։
Հարձակումները տեղի են ունենում այն ժամանակ, երբ ԱՄՆ-ն ճնշում է գործադրում Ուկրաինայի վրա՝ ընդունելու մարտական գործողությունները դադարեցնելուն ուղղված խաղաղության պայմանները: Այս առաջարկները քննադատվում են Կրեմլին առավելություն տալու համար:
