Երեքշաբթի օրը հունական լրատվամիջոցներում տարածված հաղորդագրությունների համաձայն, ՆԱՏՕ-ի գլխավոր քարտուղար Մարկ Ռուտտեն աջակցություն է հայտնել Թուրքիայի մասնակցությանը ԵՄ SAFE սպառազինության ծրագրին։

Ինչպես հաղորդում է «Կաթիմերինի» թերթը՝ հղում անելով եվրոպական աղբյուրներին, Ռուտտեի աջակցող հայտարարությունները հնչել են ԵՄ դեսպանների հետ անցյալ հինգշաբթի կայացած հանդիպման ժամանակ, այն բանից կարճ ժամանակ անց, երբ Եվրահանձնաժողովը հաստատեց Թուրքիայի SAFE-ին միանալու դիմումը։

Մասնավորապես, Ռուտեն ընդգծել է, որ ԵՄ-Թուրքիա համագործակցությունը կարևոր է ՆԱՏՕ-ի ավելի ամուր համագործակցության համար և նշել է, որ Թուրքիայի ներգրավումը ծրագրում կարող է մեղմել նրա երկարատև առարկությունները ՆԱՏՕ-ԵՄ զգայուն տեղեկատվության փոխանակման վերաբերյալ։

Ռուտեն նաև կոչ է արել պետություններին ճանաչել Թուրքիայի ռազմական կարողությունները և բարի կամքի ժեստ ցուցաբերել։

SAFE ծրագիրը, որը ընդունվել է ԵՄ առաջնորդների կողմից մայիսին, նախատեսում է մատչելի գներով երկարաժամկետ վարկեր տրամադրել՝ արագացնելու պաշտպանության ոլորտում հրատապ գնումները։

Այն մաս է կազմում Եվրոպական հանձնաժողովի ReArm Europe Plan/Readiness 2030 ծրագրի, որի նպատակն է մոբիլիզացնել ավելի քան 800 միլիարդ եվրո պաշտպանության ծախսերի համար։

Չնայած վարկերը հասանելի կլինեն միայն ԵՄ անդամ պետություններին, Ուկրաինան և ԵԱՏՄ-ԵԱԱՏՀ երկրները նույնպես կարող են մասնակցել ծրագրի շրջանակներում համատեղ գնումներին։