Չինաստանը կոչ արեց ԱՄՆ-ին և Ճապոնիային հեռացնել «Typhon» հրթիռային համակարգը տարածաշրջանից՝ վերջերս Ճապոնիայի արևմուտքում գտնվող ԱՄՆ ռազմական բազայում համատեղ զորավարժությունների համար դրա տեղակայումից հետո։
«ԱՄՆ-ն և Ճապոնիան պետք է անկեղծորեն հարգեն մյուս երկրների անվտանգության հետ կապված մտահոգությունները և դրական դեր խաղան տարածաշրջանային խաղաղության և կայունության համար՝ կոնկրետ գործողություններով, այլ ոչ թե հակառակը», - Պեկինում կայացած մամուլի ասուլիսի ժամանակ ասաց Չինաստանի ԱԳ նախարարության խոսնակ Լին Ցզյանը։
Չինաստանի արձագանքը հետևում է ԱՄՆ-ի կողմից Յամագուչի նահանգում գտնվող Իվակունիի ծովային հետևակի կորպուսի ավիաբազայում «Tomahawk» թևավոր հրթիռներ արձակելու կարողությամբ իր միջին հեռահարության հրթիռային համակարգի տեղակայմանը։
«Պեկինը կոչ արեց Վաշինգտոնին և Տոկիոյին «անսալ տարածաշրջանային երկրների կոչին, ուղղել սխալ քայլը և հնարավորինս շուտ դուրս բերել համակարգը։ Ռազմական ագրեսիայի պատմության պատճառով Ճապոնիայի ռազմական և անվտանգության քայլերը միշտ արժանանում են իր ասիական հարևանների և միջազգային հանրության ուշադրությանը», - ասաց Լինը։
Համակարգը կներկայացվի ԱՄՆ-ի և Ճապոնիայի միջև սեպտեմբերի 11-ին մեկնարկած երկշաբաթյա երկկողմ «Վճռական վիշապ» ռազմական զորավարժությունների ժամանակ։
Ճապոնիան, որը Երկրորդ համաշխարհային պատերազմից ի վեր ԱՄՆ-ի վաղեմի դաշնակիցն է Ասիա-Խաղաղօվկիանոսյան տարածաշրջանում, վերջին տարիներին զգալիորեն մեծացրել է իր պաշտպանական կարողությունները՝ ի պատասխան Չինաստանի աճող ռազմական ներկայության և տարածաշրջանային ազդեցության։
Երկիրը նաև հյուրընկալում է հազարավոր ամերիկացի զինվորների՝ բացի ռազմական բազաներից և զենքերից։
