Իրանական լրատվամիջոցները երեքշաբթի օրը հաղորդել են, որ Իսրայելա-ամերիկյան հարձակումները թիրախավորել են երկու գազի օբյեկտներ և մեկ խողովակաշար, այն բանից մի քանի ժամ անց, երբ ԱՄՆ նախագահ Դոնալդ Թրամփը հրաժարվել է էլեկտրաէներգիայի ենթակառուցվածքներին հարվածելու իր սպառնալիքից։
«Սիոնիստ և ամերիկացի թշնամու կողմից շարունակվող հարձակումների շրջանակներում թիրախավորվել են Սպահանի Քավեհ փողոցում գտնվող գազի վարչական շենքը և գազի ճնշման կարգավորման կայանը», - հայտնեց «Fars» լրատվական գործակալությունը։
Գործակալությունը, որը հավելել է, որ Իրանում գտնվող օբյեկտները «մասամբ վնասվել են», չի նշել աղբյուր, բայց միակ լրատվական միջոցն է, որը հաղորդել է միջադեպի մասին։
Գործակալությունը նաև հաղորդել է, որ հարձակման է ենթարկվել նաև երկրի հարավ-արևմուտքում գտնվող Խորամշահրի էլեկտրակայանի գազատարը։
«Fars»-ը, հղում անելով Իրաքի հետ սահմանին գտնվող քաղաքի նահանգապետին, հաղորդել է, որ «արկը հարվածել է Խորամշահրի գազատարի վերամշակման կայանի դրսի տարածքին»։
Նահանգապետը նշել է, որ ենթակառուցվածքները բնականոն գործում են, և գազի մատակարարման խափանումներ չեն եղել։
Երկուշաբթի օրը Թրամփը AFP-ին ասել է, որ Իրանի հետ «ամեն ինչ շատ լավ է ընթանում»։ Այս հայտարարությունը հնչել է Թեհրանի հետ բանակցություններում հնգօրյա դադարի և Իսլամական Հանրապետության էներգետիկ օբյեկտները թիրախավորելուց զերծ մնալու մասին նրա հայտարարությունից կարճ ժամանակ անց։
Իրանի նկատմամբ Թրամփի դիրքորոշման կտրուկ փոփոխությունը տեղի է ունեցել երկօրյա վերջնագրի լրանալուց ընդամենը մի քանի ժամ առաջ, որով սպառնում էր հարձակվել իրանական էներգետիկ օբյեկտների վրա, եթե Թեհրանը չվերաբացի ռազմավարական նշանակություն ունեցող Հորմուզի նեղուցը։
Այնուամենայնիվ, իրանական լրատվամիջոցները երկուշաբթի օրը հայտնել են, որ պատերազմը դադարեցնելու ուղղությամբ բանակցություններ չեն եղել։
