Օվալաձև աշխատասենյակում հրամանագիրը ստորագրելիս Դոնալդ Թրամփը պնդեց, որ այդ քայլը Կանադային ուղղված ուղղակի ազդանշան չէ, սակայն նշեց, որ իր հյուսիսային հարևանը երկար ժամանակ է՝ առևտրի ոլորտում շահագործում է ԱՄՆ-ին։
Նշելով, որ վաղուց էր մտածում լճի անվանումը փոխելու մասին՝ Թրամփն ասել է. «Այժմ մենք ունենք ծոց և լիճ։ Մեզ մնում է ունենալ միայն օվկիանոս։ Հնարավոր է՝ ստիպված լինենք վերանվանել Ատլանտյան կամ Խաղաղ օվկիանոսը։ Գուցե վերանվանենք երկուսն էլ»։ ԱՄՆ նախագահը հայտնել է, որ որոշումը պաշտոնական է և ուժի մեջ է մտնում անմիջապես, իսկ իր վարչակազմն արդեն ներկայացրել է բոլոր անհրաժեշտ փաստաթղթերը։
Համաձայն գործադիր հրամանի տեքստի՝ ԱՄՆ Ներքին գործերի դեպարտամենտին 30 օր է հատկացվում՝ ԱՄՆ աշխարհագրական անվանումների տեղեկատվական համակարգում անվանափոխությունը թարմացնելու համար։
Կանադայի վարչապետ Մարկ Քարնին ընդգծեց, որ «Օնտարիո» լճի անվանումը ավելի քան 400 տարվա պատմություն ունի՝ նշելով, որ այն ավելի հին է, քան թե՛ Կանադայի Համադաշնության հիմնադրումը, թե՛ ԱՄՆ-ի Անկախության հռչակագիրը։
Սոցիալական ցանցերում հրապարակված գրառման մեջ Քարնին նշել է. «Մենք գիտենք, որ Ամերիկան փոխվում է։ Փոխվում են առևտրային հարաբերությունները, արտաքին քաղաքականությունը, ազգային հուշարձաններն ու ջրագրական անվանումները։ Սակայն կանադացիները շատ լավ գիտեն, որ ամեն ինչ պետք է կոչել իր անունով։ Այս լճի անունը Օնտարիո լիճն է՝ այսօր և ընդմիշտ»։
Օնտարիոյի վարչապետ Դագ Ֆորդը սոցիալական ցանցերում նաև հայտարարել է. «Կանադացիների և մնացած աշխարհի համար սա Օնտարիո լիճն է։ Այժմ և ընդմիշտ»։
Կարո՞ղ է արդյոք Օնտարիո լիճը ամերիկյան լիճ լինել։
Չկա որևէ միջազգային մարմին, որը որոշում է միջազգային ջրերի անվանակոչումը։ Թեև ԱՄՆ նախագահը լայն լիազորություններ ունի սեփական երկրի պաշտոնական աշխարհագրական անվանումների հարցում, այլ երկրներ պարտավոր չեն ընդունել այդ որոշումները։
2025 թվականին պաշտոնը ստանձնելիս Թրամփը նմանատիպ որոշմամբ Մեքսիկական ծոցը վերանվանել էր «Ամերիկյան ծոց»։ Մեքսիկան մերժեց այդ որոշումը՝ հայտարարելով, որ միջազգային ջրային տարածքի անվանումը չի կարող փոփոխվել մեկ երկրի կողմից։
