Սահմանային ճգնաժամի սրումից հետո Կամբոջան հայտարարեց, որ Թաիլանդի հետ շարունակվող ռազմական բախումների ժամանակ զավթել է «ինքնիշխան տարածք», հաղորդում է տեղական «Քմեր Թայմս» թերթը։
Կամբոջայի պաշտպանության նախարարության խոսնակ Մալի Սոչեատան մամուլի ասուլիսի ժամանակ նշել է, որ Կամբոջայի զինված ուժերը «ուժեղ և վճռական պայքարի արդյունքում» գրավել են Տա Քրաբեյ տաճարը և Մումբեյ տարածքը՝ սահմանային գոտում։
«Մենք գրավել ենք Տա Քրաբեյ տաճարը, ներառյալ Մումբեյ տարածքը, որը հաջողությամբ վերահսկում ենք, և դա մեր ինքնիշխան տարածքն է», - ասել է Սոչեատան՝ ընդգծելով, որ Կամբոջան շարունակում է վերահսկել այդ տարածքները։
«Ինչ վերաբերում է Տա Մոան Թոմ տաճարին, որը զինված բախումների սկիզբն էր, Կամբոջան շարունակում է վերահսկել այն՝ առանց մեկ քայլ անգամ նահանջելու», - հավելել է նա։
Մինչդեռ Թաիլանդի ժամանակավոր վարչապետ Փումթամ Վեչայաչայը դատապարտել է Կամբոջայի հարձակումը՝ այն անվանելով «առանց որևէ սադրանքի»։ Ըստ Thai PBS լրատվամիջոցի՝ հարձակման հետևանքով զոհվել է 10 քաղաքացի և 1 թաիլանդացի զինվոր, իսկ 28-ը վիրավորվել են։
Փումթամը խոստացել է վճռականորեն պաշտպանել երկրի ինքնիշխանությունը՝ հայտարարելով, որ Կամբոջայի ուժերը չհրահրված հարձակումներ են իրականացրել Թաիլանդի չորս նահանգներում՝ Ուբոն Ռատչաթանի, Բուրիրամ, Սիսակետ և Սուրին։
«Առանց որևէ սադրանքի, նրանք ծանր զենքերով անկանոն կրակ են բացել Թաիլանդի տարածքի վրա, ինչը ստիպել է թաիլանդական ուժերին պատասխանել», - ասել է նա Ազգային անվտանգության խորհրդի հետ արտակարգ հանդիպումից հետո։
Կամբոջայի կողմի զոհերի մասին տեղեկություններ դեռևս չեն հրապարակվել։
Վերջին բախումը տեղի է ունեցել այն բանից մեկ օր անց, երբ թաիլանդացի զինվորներից մեկը կորցրել է ոտքը ականապատ տարածքում պայթյունի հետևանքով։
Երկու կողմերն էլ տարբեր պնդումներ են անում՝ կապված կրակոցների նախաձեռնողի հետ։
Կամբոջան դիմել է ՄԱԿ-ի Անվտանգության խորհրդին՝ «շտապ» միջամտություն խնդրելով Թաիլանդի հետ լարվածության աճի ֆոնին։
Կամբոջան և Թաիլանդը նվազեցրել են դիվանագիտական հարաբերությունների մակարդակը՝ հասցնելով այն վերջին տասնամյակների ամենացածր մակարդակին։ Երկու երկրների միջև լարվածությունը աճում է մայիսի 28-ից ի վեր, երբ սահմանային գոտում փոխհրաձգություն է տեղի ունեցել, որի հետևանքով զոհվել է Կամբոջայի զինվոր։
