«The New York Times» թերթը հաղորդում է, որ Իրանը համակարգել է իր հարձակումները Միացյալ Նահանգների օդային բազայի վրա Քաթարում՝ համագործակցելով կատարյան պաշտոնյաների հետ և նախապես զգուշացնելով՝ հնարավոր զոհերը նվազագույնի հասցնելու համար։

Ըստ թերթի՝ իրանական պաշտոնյաները Քաթարի հետ աշխատել են հարվածներից առաջ՝ տեղեկացնելով, որ հարձակումները մոտալուտ են՝ վնասները նվազեցնելու նպատակով։

Երեք իրանցի պաշտոնյաներ թերթին հայտնել են, որ Թեհրանը ստիպված էր «խորհրդանշական» պատասխան տալ ԱՄՆ-ին՝ միաժամանակ գործողությունն այնպես կազմակերպելով, որ «բոլոր կողմերին ելքի հնարավորություն տրվի»։

Աղբյուրները համեմատել են այս ռազմավարությունը Իրանի 2020 թվականի մոտեցման հետ, երբ Իրանը նախազգուշացրեց Իրաքին՝ բալիստիկ հրթիռներ արձակելուց առաջ, ինչը տեղի ունեցավ իրանցի գեներալ Ղասեմ Սոլեյմանիի սպանությունից հետո։

Իրանի զինված ուժերը հայտարարեցին, որ «կործանիչ և հզոր հրթիռային հարվածներ» են հասցրել Կատարի Ալ Ուդեյդ բազային՝ «Բաշայեր ալ-Ֆաթհ» կամ «Հաղթանակի ավետիս» գործողության շրջանակներում։

Քաթարը խափանել է հրթիռները և դատապարտել հարձակումները՝ հաղորդելով, որ անմիջական զոհեր չեն եղել։

Սպիտակ տան բարձրաստիճան պաշտոնյան հաստատել է, որ ԱՄՆ վարչակազմը «տեղյակ է և ուշադիր հետևում է Ալ Ուդեյդ օդային բազայի նկատմամբ հնարավոր սպառնալիքներին»։

ԱՄՆ դեսպանատունը ամերիկացի քաղաքացիներին խորհուրդ է տվել «ապահով վայրում մնալ»՝ կապված ԱՄՆ-ի և Իրանի միջև սրվող հակամարտության հետ, որը սկսվել է շաբաթավերջին ԱՄՆ-ի հարվածներից հետո իրանական միջուկային օբյեկտների վրա։

Հարձակումները տեղի են ունեցել այն բանից հետո, երբ ԱՄՆ նախագահ Դոնալդ Թրամփի հրամանով հարվածներ են հասցվել Իրանի կարևոր միջուկային օբյեկտներին։

Իրանի գլխավոր շտաբի պետ գեներալ-մայոր Աբդոլռահիմ Մուսավին երկուշաբթի հայտարարել է, որ ԱՄՆ-ի միջուկային օբյեկտների վրա հարվածները «չեն մնա անպատասխան»։

Թրամփը նախազգուշացրել է, որ Իրանի ցանկացած պատասխան «կհանդիպի շատ ավելի մեծ ուժի, քան այն, ինչ տեսանք» շաբաթավերջի հարվածների ժամանակ։