Ալբանիայի մայրաքաղաք Տիրանայում երեկ շարունակվեցին համալսարանի ուսանողների ցույցերը, որոնք պահանջում էին բարելավել իրենց ուսումնական պայմանները։

Հոկտեմբերի 13-ին սկսված բողոքի ցույցերի 10-րդ օրը լարվածությունը պահպանվում էր։

Մայրաքաղաքում անցկացվող ցույցերին, ավագ դպրոցի աշակերտներից և շարքային քաղաքացիներից բացի, իրենց աջակցությունը հայտնեցին նաև տարբեր համալսարանների դասախոսները։

Խորհրդարանի շենքի դիմաց խաղաղ սկսված ցույցը հետագայում շարունակվեց վարչապետի աշխատակազմի շենքի դիմաց։

Այստեղ ցուցարարները քարեր նետեցին անվտանգության ուժերի ուղղությամբ, իսկ ոստիկանությունը պատասխանեց ջրցան մեքենաներով։

Ցույցի պատճառով հարյուրավոր ոստիկաններ տեղակայվեցին։

Բողոքի ցույցերի ընթացքում՝ նախորդ օրերին, ոստիկանության և ցուցարարների միջև նույնպես բախումներ էին տեղի ունեցել։

Կրթական համակարգում փոփոխություններ պահանջող ուսանողների ցույցերն ուղեկցվել են բռնության դրսևորումներով։

Ալբանիայի վարչապետ Էդի Ռաման կրկնեց ցուցարարների հետ «երկխոսության» իր կոչը, որն առաջին անգամ հնչեցրել էր մի քանի օր առաջ։ Սակայն ուսանողները հայտարարում են, որ կշարունակեն իրենց բողոքի ակցիաները։