Միացյալ Նահանգները Ուկրաինային մատակարարում է հրետանային արկեր և շարժական հրթիռային համակարգեր, հայտնում են երկու ամերիկացի պաշտոնյաներ Reuters և Associated Press լրատվական գործակալություններին։ Այս որոշումը կայացվել է այն բանից հետո, երբ նախագահ Դոնալդ Թրամփի վարչակազմը դադարեցրել էր որոշ կարևոր զենքերի մատակարարումը Կիևին։
Անցած շաբաթ որոշ զենքերի մատակարարումների դադարեցումը, ըստ պաշտոնյաների, կապված էր այն մտահոգության հետ, որ ԱՄՆ-ի ռազմական պաշարները կարող են չափազանց նվազ լինել։
Պաշտպանության նախարար Փիթ Հեգսեթը անցած շաբաթ որոշում էր կայացրել դադարեցնել մատակարարումները՝ Պենտագոնին հնարավորություն տալու գնահատել իր զենքերի պաշարները։ Այս քայլը անակնկալի էր բերել Սպիտակ տունը։ Պենտագոնը հերքել է, որ Հեգսեթը գործել է առանց նախագահ Դոնալդ Թրամփի հետ խորհրդակցելու։
Անանուն մնալու պայմանով խոսող պաշտոնյաները չորեքշաբթի հայտնել են, որ այժմ Ուկրաինային տրամադրվում են 155 մմ հրետանային արկեր և GMLRS (շարժական հրթիռային համակարգեր)։
Պաշտոնյաները չեն նշել, թե որքան զենք է ուղարկվում և արդյոք մատակարարումը ավարտված է։ Բացի այդ, պարզ չէ՝ արդյոք այս նոր մատակարարումը վարչակազմի քաղաքականության փոփոխություն է։
Ուկրաինայի նախագահ Վլադիմիր Զելենսկին երեքշաբթի հայտարարել է, որ հանձնարարել է ընդլայնել կապերը Միացյալ Նահանգների հետ՝ ապահովելու ռազմական մատակարարումների, հատկապես հակաօդային պաշտպանության, կարևոր առաքումները։
Կրիտիկական պահ
Որոշումը կայացվել է այն ժամանակ, երբ Ուկրաինան և Ռուսաստանը փոխադարձ հարձակումներ էին իրականացնում։
Ուկրաինայի հակաօդային պաշտպանության ստորաբաժանումները հինգշաբթի վաղ առավոտյան երկրորդ գիշերն անընդմեջ պաշտպանում էին Կիևը ռուսական անօդաչու սարքերից։ Պաշտոնյաները հայտնել են, որ քաղաքի կենտրոնում բնակելի շենքում հրդեհ է բռնկվել, իսկ անօդաչու սարքերի բեկորները ընկել են տարբեր շրջաններում։
Ուկրաինայի զինված ուժերը Telegram հավելվածում նախազգուշացումներ են տարածել, որ քաղաքը կարող է ենթարկվել նաև հրթիռային հարձակման։
Քաղաքապետ Վիտալի Կլիչկոն Telegram-ում գրել է, որ կենտրոնական Շևչենկիվսկի շրջանում երկու բնակարան հրդեհվել են։ Նա նշել է, որ արտակարգ իրավիճակների ծառայությունները ուղարկվել են քաղաքի տարբեր հատվածներ։
