Տեխնոլոգիական միլիարդատեր Էլոն Մասկը, որը մի ժամանակ Դոնալդ Թրամփի մտերիմ կողմնակիցն էր, իսկ ավելի ուշ հրապարակային վեճերի մեջ էր նախագահի հետ, ուրբաթ օրը կրկին կոչ արեց փոխել Միացյալ Նահանգներում «միակուսակցական» համակարգը։
«Անկախության օրը կատարյալ ժամանակ է հարցնելու՝ արդյոք ցանկանում եք անկախանալ երկկուսակցական (որոշները կասեն՝ միակուսակցական) համակարգից», - գրել է Մասկը X հարթակում՝ հարցնելով. «Պե՞տք է ստեղծենք Ամերիկայի կուսակցությունը»։
Նրա գրառումը հաջորդեց ԱՄՆ Ներկայացուցիչների պալատի կողմից հինգշաբթի օրը ընդունված լայնածավալ հարկային կրճատումների և ծախսերի օրինագծին, որը նեղ 218-214 ձայների հարաբերակցությամբ ուղարկվեց Թրամփին՝ ստորագրման։
«Մեծ, Գեղեցիկ Օրինագիծ»
Մասկը առաջարկեց, որ մեկնարկի համար կարելի է «լազերային կենտրոնացում» իրականացնել՝ ջանքերը կենտրոնացնելով ընդամենը մի քանի կարևոր կոնգրեսական ընտրությունների վրա։
«Այս գաղափարը իրագործելու համար կարելի է կենտրոնանալ ընդամենը 2 կամ 3 Սենատի տեղերի և 8-ից 10 Ներկայացուցիչների պալատի շրջանների վրա։ Հաշվի առնելով օրենսդրական նեղ սահմանները՝ դա բավական կլինի վիճահարույց օրենքների վրա վճռորոշ ձայն ապահովելու համար՝ համոզվելու, որ դրանք արտացոլում են ժողովրդի իրական կամքը», - նշել է նա։
Չնայած Մասկը իր գրառման մեջ որևէ կոնկրետ օրինագիծ չի նշել, նրա վերջին մեկնաբանությունները հիշեցնում են նախկինում տված խոստումը՝ ստեղծել նոր քաղաքական կուսակցություն, եթե Կոնգրեսը հաստատի Թրամփի «Մեկ Մեծ, Գեղեցիկ Օրինագիծը»։
Անցյալ ամիս ԱՄՆ նախագահը և աշխարհի ամենահարուստ մարդը փոխադարձ մեղադրանքներ էին հնչեցրել միմյանց հասցեին՝ մի քանի օր անց այն բանից հետո, երբ նրանք միասին հայտնվեցին Սպիտակ տանը, և Թրամփը շնորհակալություն հայտնեց Մասկին՝ ԱՄՆ կառավարության կազմում կարճ ժամանակ աշխատելու համար։
Մասկը ղեկավարում էր Կառավարության արդյունավետության վարչությունը (DOGE), որը նպատակ ուներ կրճատել պետական ծախսերը, մինչև մայիսի վերջ։
