ԱՄՆ պետքարտուղար Մարկո Ռուբիոն ողջունել է Հայաստանի և Ադրբեջանի միջև խաղաղության պայմանագրի շուրջ համաձայնությունը՝ ընդգծելով տարածաշրջանում երկարատև անվտանգության և բարեկեցության կարևորությունը, հայտնում է Պետքարտուղարությունը։
«Պետքարտուղարը ողջունել է Ադրբեջանի հետ խաղաղության պայմանագրի շուրջ համաձայնությունը և ընդգծել է երկարատև խաղաղության կարևորությունը՝ տարածաշրջանային հակամարտությունների շրջանը կոտրելու և Հարավային Կովկասում անվտանգություն ու բարեկեցություն ապահովելու համար», – ասվում է Պետքարտուղարության խոսնակ Թամի Բրյուսի հայտարարության մեջ, որը հրապարակվել է Ռուբիոյի և Հայաստանի վարչապետ Նիկոլ Փաշինյանի միջև երեքշաբթի օրը կայացած հեռախոսազրույցից հետո։
Ռուբիոն և Փաշինյանը համաձայնել են, որ Հարավային Կովկասում ցանկացած տեսակի սրացում անընդունելի է, նշված է հայտարարության մեջ։
Կողմերը նաև քննարկել են իրենց երկրների ընդհանուր շահերը որպես ռազմավարական գործընկերներ և վերահաստատել են երկկողմ համագործակցությունը խորացնելու իրենց հանձնառությունը, հավելված է հայտարարության մեջ։
Հեռախոսազրույցը տեղի է ունեցել այն բանից մի քանի օր անց, երբ Ադրբեջանն ու Հայաստանը առանձին-առանձին հայտարարեցին խաղաղության պայմանագրի նախագծի շուրջ համաձայնության մասին, որը նպատակ ունի վերջ դնել տասնամյակներ տևած հակամարտությանը և դիվանագիտական հարաբերություններ հաստատել Բաքվի և Երևանի միջև։
