Ճապոնիայում «Դուջուան» թայֆունի հետևանքով չորս մարդ է զոհվել։

Ճապոնիայի օդերևութաբանական գործակալության հայտարարության մեջ նշվում է, որ «Դուջուան» թայֆունը շարժվում է դեպի Ճապոնիայի կենտրոնական և արևելյան հատվածների խաղաղօվկիանոսյան ափեր։

Բարձր մակարդակի նախազգուշացում է հայտարարվել Իձու Օսիմա կղզու համար (Իձու կղզեխմբի ամենամեծ կղզին, որը գտնվում է Տոկիոյից 100 կմ հարավ)՝ թայֆունի հետևանքով սպասվող հորդառատ անձրևների և սողանքների վտանգի պատճառով։

Թայֆունը, որը համընկել է Ճապոնիայում հնգօրյա տոնական շրջանի հետ, խաթարել է տրանսպորտային հաղորդակցությունը Տոկիոյում և հանգեցրել որոշ միջոցառումների չեղարկմանը։

Ակնկալվում է, որ թայֆունը, որը հանգեցրել է էլեկտրաէներգիայի անջատումների 45 000 տնային տնտեսություններում, կանցնի Տոկիոյից արևելք գտնվող Չիբա պրեֆեկտուրայի տարածքով։

Չորս մարդ զոհվեց

Թայֆունը հանգեցրել է հորդառատ անձրևների Տոկիոյում և սողանքների՝ Չիբա և Կանագավա պրեֆեկտուրաներում։

Պաշտոնյաները հայտնել են, որ թայֆունի հետևանքով Չիբայում և Կանագավայում չորս մարդ է զոհվել։

All Nippon Airways և Japan Airlines ավիաընկերությունները հայտարարել են Տոկիոյի «Հանեդա» օդանավակայանից իրականացվող և դեպի այն ուղղվող ավելի քան 270 չվերթի չեղարկման մասին, ինչն ազդել է մոտավորապես 40 000 մարդու վրա։

«Նիկկեյ» (Nikkei) թերթի տվյալներով՝ Տոկիոյում և հարակից վեց պրեֆեկտուրաներում ընդհանուր առմամբ 1,9 միլիոն մարդ է տարհանվել։