Թուրքիայի ԱԳ նախարար Հաքան Ֆիդանը հայտարարեց, որ ԱՄՆ-ի կողմից Իրանի վրա հնարավոր հարձակումը «սխալ» կլինի և կոչ է արել Վաշինգտոնին և Թեհրանին լուծել իրենց տարաձայնությունները դիվանագիտական ճանապարհով։
Չորեքշաբթի օրը «Al Jazeera»-ին տված հարցազրույցում Ֆիդանը ընդգծել է տարածաշրջանային համագործակցության կարևորությունը Իրանի հետ լարվածության սրման և Մերձավոր Արևելքում ԱՄՆ ռազմական ուժերի տեղակայման ֆոնին։
«Պատերազմի վերսկսումը սխալ է։ Իմ խորհուրդն է մեր ամերիկացի ընկերներին մեկ առ մեկ փակել Իրանի հետ գործը։ Սկսեք միջուկայինից, փակեք դա, ապա անցեք մյուսներին։ Եթե բոլոր խնդիրները ներկայացնեք մեկ փաթեթով, մեր իրանցի ընկերների համար շատ դժվար կլինի այն մարսել, իսկապես մշակել և իրականացնել։ Երբեմն դա կարող է նույնիսկ նվաստացուցիչ թվալ նրանց համար: Դժվար է սա բացատրել ոչ միայն նրանց, այլև ղեկավարությանը», - ասաց նախարարը։
Թուրքիայի արտգործնախարարը նաև ընդգծեց, որ տարբեր գաղափարախոսություններից և դավանանքներից անկախ, տարածաշրջանի երկրները պետք է համագործակցեն ազգային պետության համակարգի շրջանակներում:
