Եվրամիությունը ձգտելու է աստիճանաբար վերացնել Սիրիայի նկատմամբ սահմանված պատժամիջոցները, չորեքշաբթի օրը Սիրիայի նախագահ Ահմեդ Շարաայի հետ համատեղ մամուլի ասուլիսում հայտարարել է Ֆրանսիայի նախագահ Էմանուել Մակրոնը։ Շարան Փարիզ է ժամանել պաշտոնը ստանձնելուց հետո եվրոպական երկիր կատարած իր առաջին այցի շրջանակներում։
«Ես նախագահին ասացի, որ եթե նա շարունակի իր ճանապարհով, մենք էլ կշարունակենք մերը՝ նախ՝ աստիճանաբար վերացնելով եվրոպական տնտեսական պատժամիջոցները», - ասաց Մակրոնը։
Մակրոնը նաև ասել է, որ նրանք կսկսեն «համոզման գործընթաց»՝ համոզելու Միացյալ Նահանգներին հետևել օրինակին և համագործակցել ՄԱԿ-ի փախստականների հարցերով գերագույն հանձնակատարի (ՄՓԳՀ) և նրա գործընկերների հետ՝ տարածաշրջանային շրջանակ ստեղծելու համար, որը թույլ կտա Սիրիային «վերականգնել իր կարողություններն ու կենսական ուժերը» ու հավելեց․
«Դրա համար անհրաժեշտ կլինի երաշխիքներ տրամադրել, որ միջազգային միջոցները ճիշտ կօգտագործվեն։ Ֆրանսիան կապահովի, որ այս համատեքստում հաշվի առնվեն իր սեփական առաջնահերթությունները, քանի որ, ինչպես ասացի, Սիրիայի կայունությունն ու միասնությունը նույնպես կենսական նշանակություն ունեն Մերձավոր Արևելքի կայունության համար»։
Մակրոնը կրկին հայտարարեց, որ ինքը կպաշտպանի Բաշար ալ-Ասադի նախկին ռեժիմի օրոք սահմանված պատժամիջոցները «չերկարաձգելը» և ակտիվորեն կաշխատի որոշ անդամ պետությունների հետ, որոնք դեռևս «տատանումներ» ունեն։
«Ես կարծում եմ, որ մեր պարտականությունն է աստիճանաբար վերացնել այս պատժամիջոցները, աջակցել այս շարժմանը և տալ դրան առաջընթացի հնարավորություն առաջիկա ամիսներին»։
Փոխադարձ համագործակցություն
Սիրիայի նախագահ Շարան հայտարարել է, որ Ֆրանսիան «սիրիական ժողովրդի բարեկամն է և նրանց կողքին է եղել հեղափոխության բոլոր տարիներին»։
Շարան հավելեց, որ ինքը և նախագահ Մակրոնը քննարկել են փոխադարձ հետաքրքրություն ներկայացնող հարցերի շուրջ առաջ շարժվելու ուղիները, այդ թվում՝ Ֆրանսիայի ներդրումը Սիրիայի վերակառուցման և կայունացման գործում, որը «ներկայացնում է ամբողջ տարածաշրջանի կայունությունը»։
Նա նաև հայտարարել է, որ Մակրոնի հետ քննարկել է անվտանգության, տնտեսության, արդարադատության և ահաբեկչության դեմ պայքարի ոլորտներում համագործակցության հնարավորությունները։
Նա շնորհակալություն հայտնեց Մակրոնին և ֆրանսիացի ժողովրդին վերջին տարիներին սիրիացի փախստականներին ընդունելու և այսօր իրեն հյուրընկալելու համար։
Շարաան շեշտեց, որ իր վարչակազմը «թույլ չի տա կրոնական բախումներին և օտարերկրյա կողմերին խախտել Սիրիայի ինքնիշխանությունը» և վճռականորեն հայտարարեց, որ «Սիրիայի ապագան չի ձևավորվի փակ սենյակներում կամ հեռավոր մայրաքաղաքներում»։
Սիրիայի դեմ միջազգային պատժամիջոցների վերաբերյալ նա ասել է, որ այդ պատժամիջոցները «սահմանվել են նախկին ռեժիմի կողմից կատարված հանցագործությունների պատճառով, և ռեժիմի տապալումից հետո դրանց շարունակման համար որևէ արդարացում չկա»։
