ՄԱԿ-ի Անվտանգության խորհուրդը ընդունել է նախագիծ, որով Սիրիայի նախագահ Ահմեդ ալ-Շարային և Ներքին գործերի նախարար Անաս Խատաբին հանվում են ԴԱԻՇ-ի և Ալ-Քաիդայի պատժամիջոցների ցուցակից։

ԱՄՆ-ի կողմից մշակված այս նախագիծը ստացավ 14 ձայն, իսկ Չինաստանը ձեռնպահ մնաց։

ՄԱԿ-ում ԱՄՆ-ի դեսպան Մայք Ուոլցը ողջունեց որոշման ընդունումը։ «Այս տեքստի ընդունմամբ խորհուրդը հզոր քաղաքական ազդանշան է ուղարկում, որը ճանաչում է, որ Սիրիան նոր դարաշրջան է մտնում»,- ասաց նա։ «Նախագահ ալ-Շարային և Ներքին գործերի նախարար Խատաբին ցուցակից հանելը պետք է օգնի սիրիացի ժողովրդին ստանալ լավագույն հնարավորությունը»։

Չինաստանի դեսպան Ֆու Ցոնգը նշեց, որ որոշումը չի անդրադառնում «բոլոր կողմերի օրինական մտահոգություններին»։ «Նախագծի հեղինակները լիովին հաշվի չեն առել բոլոր անդամների տեսակետները և ստիպել են խորհուրդին գործողություններ ձեռնարկել, չնայած խորհրդի անդամների միջև մեծ տարաձայնություններին՝ փորձելով սպասարկել իրենց քաղաքական օրակարգը»,- ասաց Ֆուն՝ նկատի ունենալով ԱՄՆ-ին։ «Չինաստանը պատրաստ է աշխատել միջազգային հանրության հետ՝ շարունակելու կառուցողական դեր խաղալ Սիրիայում անվտանգություն, կայունություն և զարգացում ապահովելու գործում»,- հավելեց նա։

Ռուսաստանի ՄԱԿ-ում դեսպան Վասիլի Նեբենզիան ընդգծեց, որ «որոշումը վերահաստատում է Անվտանգության խորհրդի նվիրվածությունը Սիրիայի Արաբական Հանրապետության ինքնիշխանությանը, անկախությանը, միասնությանը և տարածքային ամբողջականությանը»։ «Մենք ակնկալում ենք, որ այս հիմնարար սկզբունքները կհարգվեն միջազգային հանրության բոլոր անդամների կողմից, ներառյալ Իսրայելը, որը շարունակում է գործել իր կանոններով և օկուպացնել Սիրիայի ինքնիշխան տարածքի մի մասը, ներառյալ Գոլանի բարձունքները»,- ասաց նա։

Դամասկոսը ողջունում է քայլը

Սիրիան ողջունեց ՄԱԿ-ի Անվտանգության խորհրդի որոշումը՝ նախագահ ալ-Շարային և Ներքին գործերի նախարար Խատաբին պատժամիջոցների ցուցակից հանելու վերաբերյալ՝ այն անվանելով Դամասկոսի դիվանագիտական օրինականության աճող ապացույց։

X-ում արված հայտարարության մեջ Արտաքին գործերի նախարար Ասադ ալ-Շաիբանին ասաց. «Կրկին և ոչ վերջին անգամ, սիրիական դիվանագիտությունը հաստատում է իր ակտիվ ներկայությունը և իր կարողությունը՝ կայուն առաջընթաց գրանցելու խոչընդոտները վերացնելու և դեպի ավելի բաց և կայուն սիրիական ապագա ճանապարհ հարթելու գործում»։

Սիրիան իր «շնորհակալությունն է հայտնում ԱՄՆ-ին և բարեկամական երկրներին՝ Սիրիային և նրա ժողովրդին ցուցաբերած աջակցության համար»։