Եվրոպական հանձնաժողովը «Եվրոպական պաշտպանական արդյունաբերության ծրագրի» շրջանակներում 188,2 միլիոն դոլար (168,2 միլիոն եվրո) է հատկացրել ութ նախագծի, որոնք ուղղված են Եվրոպայի պաշտպանական արտադրական կարողությունների ընդլայնմանը։
Չորեքշաբթի օրը տարածված հայտարարության համաձայն՝ ակնկալվում է, որ այդ նախագծերը կմոբիլիզացնեն 1,41 միլիարդ դոլարի (1,26 միլիարդ եվրո) արդյունաբերական ներդրումներ՝ արագացնելու և ընդլայնելու հրթիռներում, անօդաչու թռչող սարքերում (ԱԹՍ) և զինամթերքում կիրառվող էներգետիկ նյութերի արտադրությունը։
Նախագծերը, որոնք նախատեսվում է գործարկել 2027 թվականից սկսած, ակնկալվում է, որ մինչև 90%-ով կկրճատեն արտադրական ցիկլի տևողությունը։ Բացի այդ, դրանք հնարավորություն կտան տարեկան արտադրել ավելի քան 20 000 տոննա էներգետիկ նյութեր, 3500 շարժիչային համակարգ՝ անօդաչու թռչող սարքերի (ԱԹՍ) և հրթիռների համար, 200 000 մարտագլխիկ՝ շրջանառու զինամթերքի (կամիկաձե ԱԹՍ-ների) համար, ինչպես նաև 60 միլիոն միավոր զինամթերք։
Ներդրումները ներառում են 14 անդամ պետություններում և Նորվեգիայում տեղակայված 17 արտադրական օբյեկտներ՝ միաժամանակ ուժեղացնելով դրանց պաշտպանվածությունը աճող ֆիզիկական և կիբերսպառնալիքներից։
Այս նախաձեռնությունը հիմնված է «Զինամթերքի արտադրությանն աջակցելու մասին ԵՄ ակտի» վրա․ սա արտակարգ միջոցառում է, որը ներդրվել է Ուկրաինայում պատերազմի բռնկումից հետո՝ արտադրական խոչընդոտները հաղթահարելու և զինամթերքի արտադրական հզորությունները մեծացնելու նպատակով։
