Մահացավ 3 մարդ, մի քանիսը վիրավորվեցին, երբ Գերմանիայի հարավ-արևմուտքում գտնվող անտառապատ տարածքում տարածաշրջանային ուղևորատար գնացքը դուրս եկավ գծերից, հայտնեց ոստիկանությունը։
Կիրակի օրը, ժամը 18:10-ի սահմաններում, Բադեն-Վյուրտեմբերգի Ռիդլինգեն քաղաքի մոտ տեղի ունեցած վթարի ժամանակ գնացքում գտնվել է մոտ 100 ուղևոր։
Իշխանությունները հրաժարվել են մանրամասներ տրամադրել վիրավորների թվի կամ դրանց ծանրության մասին, սակայն Bild թերթը հայտնել է, որ արտակարգ իրավիճակների աշխատակիցները հայտնել են 50 վիրավորի մասին։
Գերմանական երկաթուղային օպերատոր Deutsche Bahn-ը հաստատել է մի քանի մահվան և բազմաթիվ վիրավորների մասին։ Այն հայտնել է, որ երկու գնացքի վագոն դուրս է եկել գծերից «դեռևս անհայտ պատճառներով»։
Օպերատորը հայտնել է, որ վթարի հանգամանքները ներկայումս քննվում են, և երթուղու 40 կիլոմետրանոց հատվածում երթևեկությունը դադարեցվել է։
Ուղևորատար գնացքը դուրս է եկել գծերից անտառապատ տարածքում՝ Գերմանիայի Զիգմարինգենից դեպի Ուլմ ուղևորվելիս։
Հնացած գնացքային ենթակառուցվածք
Գերմանիայի կանցլեր Ֆրիդրիխ Մերցը սոցիալական ցանցերում իր գրառման մեջ ցավակցություն է հայտնել զոհերի ընտանիքներին։
«Ես սերտ կապի մեջ եմ Ներքին գործերի և տրանսպորտի նախարարների հետ և խնդրել եմ նրանց աջակցել փրկարարական խմբերին բոլոր հնարավոր միջոցներով», - ասել է կանցլեր Մերցը X սոցցանցում։
Գերմանական տրանսպորտը հաճախ քննադատվում է ուղևորների կողմից իր հնացած ենթակառուցվածքների համար, որոնք հաճախակի են առաջացնում գնացքների ուշացումներ և տարբեր տեխնիկական խնդիրներ։
Կառավարությունը խոստացել է առաջիկա մի քանի տարիների ընթացքում ներդնել մի քանի հարյուր միլիարդ եվրո, հիմնականում ենթակառուցվածքների արդիականացման համար։
2022 թվականի հունիսին Գերմանիայի հարավում գտնվող Բավարական Ալպերի հանգստավայրերից մեկի մոտ գնացքը դուրս է եկել գծերից, որի հետևանքով մահացել է 4 մարդ, իսկ տասնյակները վիրավորվել են։
Գերմանիայի պատմության մեջ ամենամահացու երկաթուղային վթարը տեղի է ունեցել 1998 թվականին, երբ Ստորին Սաքսոնիա նահանգի Էշեդե քաղաքում ռելսերից դուրս է եկել «Դոյչե Բան» պետական երկաթուղային արագընթաց գնացքը, որի հետևանքով մահացել է 101 մարդ։
