ԱՄՆ նախագահ Դոնալդ Թրամփը հայտարարել է, որ Հյուսիսային Կորեան միակ երկիրը չէ, որը փորձարկում է միջուկային զենքեր՝ պնդելով, որ Ռուսաստանն ու Չինաստանն էլ են նման փորձարկումներ կատարում։ Այս մասին նա ասել է CBS News հեռուստաընկերության 60 Minutes հաղորդման ընթացքում տված հարցազրույցում։
«Ռուսաստանը փորձարկումներ է անում, Չինաստանն էլ է փորձարկումներ անում, բայց դրա մասին չեն խոսում»,- ասել է Թրամփը կիրակի օրը, երբ հաղորդավար Նորա Օ'Դոնելը նշել է, որ միակ երկիրը, որը միջուկային զենք է փորձարկում, Հյուսիսային Կորեան է։
Նրա այս հայտարարությունները հնչեցին երեք օր անց այն բանից հետո, երբ նա հրահանգեց ԱՄՆ զինված ուժերին վերսկսել միջուկային զենքերի փորձարկման գործընթացը՝ ավելի քան 30 տարվա դադարից հետո։
«Այլ երկրներ փորձարկումներ են անում։ Մենք միակ երկիրն ենք, որը չի փորձարկում, և ես չեմ ուզում, որ մենք լինենք միակ երկիրը, որը չի փորձարկում»,- ընդգծել է Թրամփը՝ հավելելով, որ «միշտ չէ, որ գիտես», թե որտեղ են այդ երկրները կատարում իրենց փորձարկումները։
‘Հսկայական միջուկային ուժ’
Վերահաստատելով, որ ինքը չի ցանկանում օգտագործել միջուկային զենքերը, Թրամփը կրկին ընդգծել է դրանց փորձարկման անհրաժեշտությունը՝ հասկանալու համար, թե ինչպես են դրանք աշխատելու։
«Չէ՞ որ դա տրամաբանական է։ Դուք ստեղծում եք միջուկային զենքեր, բայց դրանք չեք փորձարկում։ Ինչպե՞ս եք դա անելու։ Ինչպե՞ս եք իմանալու, թե դրանք աշխատում են, թե ոչ»,- հավելել է նա։
Թրամփը նաև ընդգծել է, որ ԱՄՆ-ն ունի «հսկայական միջուկային ուժ», ավելին, քան «ցանկացած այլ երկիր»։
«Ռուսաստանը երկրորդն է։ Չինաստանը շատ հեռու է երրորդ տեղում, բայց հինգ տարում նրանք կհասնեն մեզ։ Գիտեք, նրանք արագորեն արտադրում են, և ես կարծում եմ, որ մենք պետք է ինչ-որ բան անենք միջուկազերծման ուղղությամբ... Մենք ունենք բավականաչափ միջուկային զենք՝ աշխարհը 150 անգամ պայթեցնելու համար։ Ռուսաստանն ունի շատ միջուկային զենքեր, իսկ Չինաստանը նույնպես կունենա շատ»,- նշել է նա։
