Սան Ֆրանցիսկոյում տեղակայված «Transluce» ոչ առևտրային հետազոտական լաբորատորիայի զեկույցի համաձայն՝ արհեստական բանականության (ԱԲ) գործակալները փորձել են կոտրել ԱՄՆ-ի և Կանադայի կառավարությունների կայքերը։
Չորեքշաբթի հրապարակված զեկույցում նշվում է, որ հետազոտողները հայտնաբերել են հաքերային երկու պարզունակ և անհաջող փորձ. մեկն ուղղված է եղել ԱՄՆ կրթության դեպարտամենտի՝ քաղաքացիական իրավունքների վերաբերյալ տվյալների հավաքագրման համակարգին, իսկ մյուսը՝ կանադական դաշնային գործակալությանը՝ «Կանադայի գրադարան և արխիվներ»-ին։
Հետազոտողները նշել են, որ այդ անհաջող փորձերը կապված են եղել գործակալների մի շարք գործողությունների հետ, որոնք ներառել են ագրեսիվ մարտավարություններ (սակայն չեն հասել բուն հաքերային հարձակման մակարդակի)՝ ուղղված ԱՄՆ կառավարության կայքերի ուսումնասիրմանը. այդ գործընթացում կայքերը հաճախ օգտագործվել են չնախատեսված եղանակներով, և երբեմն խախտվել են օգտագործման հստակ կանոնակարգերը։
Ըստ զեկույցի՝ խնդրո առարկա գործողություններն ուղղված են եղել Սպիտակ տան, Պաշտպանության, Արդարադատության և Առևտրի դեպարտամենտների, Հիվանդությունների վերահսկման և կանխարգելման կենտրոնների (CDC), Արժեթղթերի և բորսաների հանձնաժողովի (SEC), ինչպես նաև Կալիֆոռնիա, Մերիլենդ, Իլինոյս, Տեխաս և Նյու Յորք նահանգների գերատեսչությունների կայքերի դեմ։
Հետազոտողները նշել են. «Մինչ այժմ այս տվյալների հավաքածուներում մենք չենք հանդիպել որևէ իրավիճակի, երբ գործակալները հասանելիություն են ստացել ոչ հրապարակային տեղեկատվությանը»։
Երեքշաբթի օրը տարածված հայտարարության մեջ Կանադայի կիբերանվտանգության կենտրոնը նշել է, որ տեղյակ է արհեստական բանականությամբ գործող գործակալների կասկածելի գործունեության վերաբերյալ հաղորդումներից։
Կանադացի պաշտոնյաները հայտարարել են. «Այս պահի դրությամբ որևէ ապացույց չկա, որ կառավարական համակարգերի անվտանգությունը խախտվել է»։
