Երկուշաբթի օրը տարածած հայտարարության մեջ Իրաքի ներքին գործերի նախարարությունը տեղեկացրել է, որ ստեղծել է տվյալների բազա՝ երկրում մոտ 6 միլիոն միավոր զենք գրանցելու նպատակով։

Իրաքի լրատվական գործակալության հրապարակած հայտարարության մեջ նախարարությունը տեղեկացրել է, որ փակել է նաև 71 կեղծ գրասենյակ, որոնք ներկայացել են որպես «Ժողովրդական մոբիլիզացիայի ուժերի» (PMF)՝ պետության աջակցությունը վայելող զինված խմբավորումների միավորող կառույցի մաս կազմող կազմակերպություններ։

Նախարարությունը տեղեկություններ չի տրամադրել փակված գրասենյակների գտնվելու վայրերի կամ զենքի վերաբերյալ տվյալների հավաքագրման համար կիրառված մեթոդների վերաբերյալ։

Ուրբաթ օրը Իրաքի պաշտոնյաները երկրի տարբեր վայրերում բացեցին հրազենի գրանցման և արտոնագրման գրասենյակներ՝ որպես զենքը պետական ​​վերահսկողության տակ առնելու կառավարական ծրագրի մաս։

Զինվորական խոսնակ Սաբահ ալ-Նումանը հունիսի 3-ին հայտարարել էր, որ ստեղծվել և իր աշխատանքն է սկսել զենքը պետական ​​վերահսկողության տակ առնելու ծրագրի իրականացմամբ զբաղվող հանձնաժողովը։

Պետական ​​վերահսկողությունից դուրս գտնվող զինատեսակների խնդիրը շարունակում է մնալ Իրաքի անվտանգությանն ու քաղաքական կացությանն առնչվող ամենահրատապ հարցերից մեկը։ Երկրում գործում են բազմաթիվ զինված խմբավորումներ, այդ թվում՝ «Ժողովրդական մոբիլիզացիայի ուժերի» (PMF) հետ կապված և ինքնուրույն գործող խմբեր։

Կառավարությունը ձգտում է ամրապնդել զենքի նկատմամբ իր վերահսկողությունը և ուժեղացնել պետական ​​անվտանգության կառույցների հեղինակությունը՝ որպես ներքին կայունությունն ամրապնդելու և երկիրը տարածաշրջանային լարվածության ազդեցությունից պաշտպանելուն ուղղված ջանքերի մաս։