Մանչեստրում սինագոգի մոտ մեքենայի և դանակով զինված հարձակում է տեղի ունեցել, կան 2 զոհ և 4 վիրավոր
Մեծ Բրիտանիայի վարչապետ Սթարմերն ասել է. «Այն փաստը, որ դա տեղի է ունեցել Յոմ Կիպուրի օրը, հարձակումն ավելի սարսափելի դարձրեց»։
Մանչեսթերի հյուսիսում գտնվող սինագոգի մոտ մեքենայի և դանակով հարձակման հետևանքով երկու մարդ զոհվել է, չորսը՝ վիրավորվել, հայտնում է ոստիկանությունը։ Հարձակվողը սպանվել է։
Մեծ Մանչեսթերի ոստիկանությունը «մեծ միջադեպ» է հայտարարել առավոտյան ժամը 9:30-ին (0830 GMT) այն բանից հետո, երբ ոստիկանները կանչվել են Հիթոն Պարկի հրեական համայնքի սինագոգ՝ Կրումսալ թաղամասում։
«Փրկարարները ժամանել են դեպքի վայր... և օգնություն են ցուցաբերում բնակիչներին», նշվում է հաղորդագրության մեջ՝ հավելելով, որ «ներկայումս չորս մարդ վիրավորվել է՝ ինչպես մեքենայի, այնպես էլ դանակահարության հետևանքով»։
«Մեծ Մանչեսթերի ոստիկանության զինված ուժերը կրակ են բացել ժամը 9:38-ին։ Մի տղամարդ սպանվել է, որը, ենթադրաբար, հանցագործն է», նշվում է ոստիկանության հայտարարության մեջ։
Վարչապետ Քիր Սթարմերը հայտարարել է, որ «սարսափած է հարձակման պատճառով», և բրիտանական պաշտոնյան հաստատել է, որ նա վաղաժամ կվերադառնա Դանիայում ԵՄ-ի հետ բանակցություններից։
«Այն փաստը, որ սա տեղի է ունեցել Յոմ Կիպուրի օրը՝ հրեական օրացույցի ամենասուրբ օրը, այն ավելի սարսափելի է դարձնում», հավելել է նա։
«Իմ մտքերն ու աղոթքները բոլոր տուժածների հարազատների հետ են, և իմ շնորհակալությունն եմ հայտնում արտակարգ ծառայություններին և բոլոր առաջին արձագանքողներին»։
«Լուրջ միջադեպ»
Մանչեսթերի քաղաքապետ Էնդի Բերնհեմը BBC-ին ասել է, որ քաղաքը «լուրջ միջադեպի» հետ է առնչվում։
«Միևնույն ժամանակ, կարող եմ որոշակի վստահություն տալ, որ անմիջական վտանգը կարծես թե վերացել է, և Մանչեսթերի ոստիկանությունը շատ արագ է գործել՝ հիանալի աջակցություն ստանալով բնակիչներից և անվտանգության աշխատակիցներից», նշել է նա։
Զինված ուժերը տեղակայվել են ժամը 9:34-ին՝ բնակիչների հաղորդագրությունների հիման վրա, որ անվտանգության աշխատակիցը դանակով հարձակման է ենթարկվել։
Բերնհեմը կոչ է արել մարդկանց «չտարածել ենթադրություններ սոցիալական ցանցերում», միաժամանակ նշելով, որ հրեական համայնքը «շատ անհանգստացած կլինի այս լուրից»։
Հյուսիս-Արևմուտքի շտապ օգնության ծառայությունը հայտնել է, որ «ռեսուրսներ է ուղարկել դեպքի վայր»։
«Մենք ներկայումս գնահատում ենք իրավիճակը և աշխատում արտակարգ ծառայությունների մյուս անդամների հետ», հավելել է ծառայությունը։