ԱՄՆ նախագահ Դոնալդ Թրամփը հայտարարել է, որ Հարավային Կորեան համաձայնել է ԱՄՆ-ի հետ ստորագրել լայնածավալ տնտեսական և պաշտպանական փաթեթ։
«Հարավային Կորեան համաձայնել է վճարել ԱՄՆ-ին 350 միլիարդ դոլար՝ իջեցնելու համար այն մաքսատուրքերը, որոնք ԱՄՆ-ն սահմանել է նրանց նկատմամբ», - գրել է Թրամփը հինգշաբթի օրը իր Truth Social հարթակում։
Բացի այդ, նա նշել է, որ Հարավային Կորեան համաձայնել է մեծ քանակությամբ գնել ամերիկյան նավթ և գազ, իսկ հարավկորեական ընկերությունների և գործարարների ներդրումները ԱՄՆ-ում կգերազանցեն 600 միլիարդ դոլարը։
«Մեր ռազմական դաշինքը ավելի ուժեղ է, քան երբևէ, և դրա հիման վրա ես նրանց թույլտվություն եմ տվել կառուցել միջուկային էներգիայով աշխատող սուզանավ, որը շատ ավելի ժամանակակից է և արագ, քան նրանց ներկայիս դիզելային սուզանավերը», - հավելել է Թրամփը։
Չորեքշաբթի օրը Հարավային Կորեայում նախագահ Լի Ջե-Մյոնգի հետ հանդիպման ժամանակ Թրամփը նշել է, որ Հարավային Կորեայի հետ առևտրային համաձայնագիրը «գրեթե ավարտված է», սակայն չի նշել, որ առաջնորդները վերջնական համաձայնության են եկել։
Հինգշաբթի օրը ավելի ուշ Թրամփը նախատեսում է հանդիպել իր չինացի գործընկեր Սի Ցզինպինի հետ, ով գտնվում է Հարավային Կորեայում՝ Ասիա-Խաղաղօվկիանոսյան տնտեսական համագործակցության (APEC) գագաթնաժողովի շրջանակներում։ Թրամփը չի մասնակցի տարածաշրջանային հանդիպմանը։
