Դոհան հայտարարել է 2036 թվականի Օլիմպիական և Պարալիմպիկ խաղերը հյուրընկալելու իր թեկնածության մասին: Երեքշաբթի օրը պաշտոնյաները հայտարարեցին, որ Պարսից ծոցի երկիրը նպատակ ունի հյուրընկալել ևս մեկ խոշոր մարզական միջոցառում՝ իր էներգետիկ տնտեսությունը դիվերսիֆիկացնելու համար։
Վարչապետ և արտաքին գործերի նախարար շեյխ Մոհամմեդ բին Աբդուլռահման Ալ Թանին ընդգծել է, որ ընտրվելու դեպքում Քաթարը կդառնա Մերձավոր Արևելքի և Հյուսիսային Աֆրիկայի առաջին երկիրը, որը կհյուրընկալի Օլիմպիական խաղերը։
«Քաթարի օլիմպիական կոմիտեի (QOC) կողմից 2036 թվականի Օլիմպիական և Պարալիմպիկ խաղերը հյուրընկալելու պաշտոնական թեկնածության ներկայացումը նոր հանգրվան է Քաթարի ճանապարհորդության մեջ», - Քաթարի պաշտոնական լրատվական գործակալության կողմից տարածված հայտարարության մեջ նշել է Ալ Թանին։
«Դիմումը ներկայացվել է Քաթարի կողմից խոշոր միջազգային մարզական միջոցառումների, մասնավորապես՝ 2022 թվականի ՖԻՖԱ-ի աշխարհի առաջնության հաջող հյուրընկալության հիման վրա», - ասաց Քաթարի արչապետ և արտաքին գործերի նախարար շեյխ Մոհամմեդ բին Աբդուլռահման Ալ Թանին։
Որոշ իրավապաշտպան խմբեր պնդում են, որ 2022 թվականի մրցաշարից առաջ Կատարում մահացել են «հազարավոր» միգրանտ աշխատողներ։ Սակայն Դոհան հայտարարեց, որ Աշխարհի գավաթի նախագծերի վրա մահացել է ընդամենը 37 աշխատող, և նրանցից միայն երեքը մահացել են աշխատանքային վթարներից։
Միևնույն ժամանակ, դիմորդ երկրները այլևս պարտավոր չեն հրապարակայնորեն հայտարարել իրենց օլիմպիական թեկնածության մասին։
Խաղերը ամեն մրցաշրջանում փոխվում են մայրցամաքների միջև։ Քանի որ 2024, 2028 և 2032 թվականների խաղերը անցկացվում են համապատասխանաբար Եվրոպայում, Հյուսիսային Ամերիկայում և Օվկիանիայում, 2036 թվականի օլիմպիական խաղերը, հավանաբար, կանցկացվեն Ասիայում կամ, առաջին անգամ, Աֆրիկայում։
Հաջորդ խաղերի հյուրընկալողի վերաբերյալ որոշումը կլինի Քիրսթի Քովենթրիի առաջին կարևոր խնդիրը, ով անցյալ ամիս դարձավ Միջազգային օլիմպիական կոմիտեի (ՄՕԿ) առաջին կին նախագահը։
