«Յոահիմ-Մա Ստրադիվարիուս» անունը կրող ջութակը, որը արտադրվել է 1714 թվականին հայտնի ջութակահար Անտոնիո Ստրադիվարիի կողմից, Նյու Յորքում կայացած աճուրդում վաճառվել է 11,3 միլիոն դոլարով։ Սպասվում էր, որ Sotheby's-ի կողմից կազմակերպված աճուրդում ջութակի գինը կկազմի 12-18 միլիոն դոլար: Սակայն այս ցուցանիշը չհամապատասխանեց սպասելիքներին:
«Յոահիմ-Մա Ստրադիվարիուսը» արտադրվել է Ստրադիվարիի «Ոսկե ժամանակաշրջանում», երբ նա գտնվում էր իր վարպետության և ակուստիկ կարողության գագաթնակետին: Մեկ այլ գործոն, որը բարձրացնում է ջութակի արժեքը, այն է, որ համարվում է, որ հայտնի կոմպոզիտոր Յոհաննես Բրամսը ոգեշնչվել է այս ջութակով, երբ նա գրել է իր «Ջութակի կոնցերտը ռե մաժոր»։ Այս ջութակը օգտագործվել է նաև կոնցերտի պրեմիերայի ժամանակ՝ 1879 թ.:
«Այս արտասովոր ջութակը ներկայացնում է վարպետության գագաթնակետը և դասական երաժշտության պատմությունը, նրա յուրահատուկ ձայնն ու պատմությունը շարունակում են գրավել կոլեկցիոներներին և երաժիշտներին», - ասում է Sotheby's-ի նախագահ Մարի-Կլաուդիա Հիմենեզը: Խիմենեսն ընդգծել է, որ «Յոահիմ-Մա Ստրադիվարիուսը գրավել է համաշխարհային ուշադրությունը և հասել երաժշտական գործիքի համար երբևէ վճարված ամենաբարձր գներից մեկին»:
Աճուրդը սկսվեց 8 միլիոն դոլարի բացման գնով և արագ հասավ 10 միլիոն դոլարի: Սենյակը լուռ մնաց, քանի որ աճուրդավար Ֆիլիս Կաոն 10,5 միլիոն դոլարի առաջարկ էր փնտրում: 10 միլիոն դոլարի վերջնական հայտից հետո աճուրդն ավարտվեց։ Վերջնական գինը ներառում է աճուրդի տան վճարները:
Ջութակն անվանվել է հայտնի ջութակի վիրտուոզներ հունգարացի Ջոզեֆ Յոահիմի և չինացի Սի-Հոն Մա անունով։ Նրա մահից հետո Մաի ժառանգները ջութակը նվիրեցին Բոստոնի New England կոնսերվատորիային։ Ստացված եկամուտը կոնսերվատորիան օգտագործելու է ուսանողական կրթաթոշակների համար։
«Այս վաճառքը փոխակերպիչ ազդեցություն կունենա ապագա ուսանողների համար և կստեղծի ամենամեծ կրթաթոշակային հիմնադրամը Նոր Անգլիայի կոնսերվատորիայում», - ասաց Անդրեա Քալինը, Նոր Անգլիայի կոնսերվատորիայի նախագահը ու նշել է հետևյալը․«Պատիվ է ունենալ Յոահիմ-Մա Ստրադիվարիուսը համալսարանում, և մենք անհամբեր սպասում ենք, որ նրա ժառանգությունը շարունակվի համաշխարհային ասպարեզում»։
