Մեծ Բրիտանիան, Ավստրալիան, Կանադան, Նոր Զելանդիան և Նորվեգիան հայտարարել են պատժամիջոցների մասին երկու իսրայելցի նախարարների դեմ՝ «պաղեստինյան համայնքների նկատմամբ բռնության կրկնվող հրահրումների» համար, հայտնում է Մեծ Բրիտանիայի կառավարությունը։
Իսրայելի ֆինանսների նախարար Բեզալել Սմոտրիչը և ազգային անվտանգության նախարար Իթամար Բեն Գվիրը ենթարկվելու են ճանապարհորդական արգելքի և ակտիվների սառեցման, նշվում է Մեծ Բրիտանիայի արտաքին գործերի նախարարության երեքշաբթի օրվա հայտարարության մեջ։
Ավելի վաղ The Times թերթը հայտնել էր, որ պատժամիջոցները կկիրառվեն Գազայի պատերազմի ընթացքում նրանց վարքագծի համար։
Ի պատասխան այս որոշման՝ Իսրայելի արտաքին գործերի նախարար Գիդեոն Սարը հայտարարեց, որ այս քայլը «անհավանական է»։ Սարը լրագրողներին ասաց, որ կառավարությունը հաջորդ շաբաթվա սկզբին հատուկ նիստ կանցկացնի՝ որոշելու, թե ինչպես արձագանքել «անընդունելի որոշմանը»։
Մեծ Բրիտանիան, ինչպես նաև այլ եվրոպական երկրներ, ուժեղացնում են ճնշումը Իսրայելի վարչապետ Բենյամին Նեթանյահուի կառավարության վրա՝ Գազայում օգնության մատակարարման շրջափակումը դադարեցնելու համար, որտեղ միջազգային փորձագետները նախազգուշացնում են սովի անխուսափելիության մասին։
Լոնդոնը անցած ամիս դադարեցրեց Իսրայելի հետ ազատ առևտրի բանակցությունները՝ «անթույլատրելի քաղաքականություն» վարելու համար գրավյալ Արևմտյան ափում և Գազայում, կանչեց Իսրայելի դեսպանին և հայտարարեց լրացուցիչ պատժամիջոցներ գրավյալ Արևմտյան ափի բնակիչների դեմ։
Արտաքին գործերի նախարար Դեյվիդ Լամին, ով Իսրայելի վերջին հարձակումը անվանել է «այս հակամարտության մութ նոր փուլ», նախկինում դատապարտել է Սմոտրիչի հայտարարությունները Գազայի հնարավոր մաքրման և բնակիչների երրորդ երկրներ տեղափոխման վերաբերյալ։
