Իսրայելի պաշտպանության նախարար Իսրայել Կացը հրամայել է զինվորականներին ինտենսիվ հարձակումներ սկսել Իրանի մայրաքաղաք Թեհրանի վրա՝ պնդելով, որ Իրանը խախտել է երկու ոխերիմ թշնամիների միջև կնքված հրադադարը։
«Ես հրահանգեցի Իսրայելի պաշտպանության բանակին (IDF), վարչապետի հետ համաձայնեցնելով, շարունակել ինտենսիվ հարվածները Թեհրանում՝ չեզոքացնելու ռեժիմի թիրախները և ահաբեկչական ենթակառուցվածքները Թեհրանում՝ նախորդ օրվա գործողությունից հետո»,- նշել է Կացը Yedioth Ahronoth թերթի մեջ հրապարակված հայտարարության մեջ։
Կացը պնդել է, որ հարվածները հրահանգել է «ԱՄՆ նախագահի կողմից հայտարարված հրադադարի բացարձակ խախտման և Իսրայելի ուղղությամբ հրթիռների արձակման պատճառով»։
Այս հայտարարությունը հնչել է այն բանից հետո, երբ Իսրայելի բանակը տեղեկացրել է հանրությանը, որ այժմ անվտանգ է դուրս գալ ապաստարաններից։
Ավելի վաղ բանակը հայտնել էր, որ հյուսիսային Իսրայելում օդային տագնապի ազդանշաններ են հնչել երեքշաբթի օրը՝ Իրանից նոր հրթիռային հարձակման հայտնաբերումից հետո, որը տեղի է ունեցել ժամեր անց Դոնալդ Թրամփի կողմից հրադադարի հայտարարությունից։
Իրանը հերքում է մեղադրանքները
Իրանը, սակայն, հերքում է Իսրայելի պնդումները, թե հրադադարի համաձայնությունից հետո հրթիռներ է արձակել Իսրայելի ուղղությամբ, ըստ IRIB հեռուստաընկերության և ISNA լրատվական գործակալության։
Հրադադարի խախտումը տեղի է ունեցել այն բանից հետո, երբ Իսրայելը հայտարարել էր, որ համաձայնել է երկկողմանի հրադադարի Իրանի հետ՝ Թրամփի առաջարկի հիման վրա։
Թրամփը երկուշաբթի օրը հայտարարել էր, որ Իսրայելը և Իրանը համաձայնել են «ամբողջական» և «լիակատար» հրադադարի՝ ավարտելով «12-օրյա պատերազմը», որը սկսվել էր հունիսի 13-ին՝ Իսրայելի հարվածներով Իրանի միջուկային օբյեկտներին և մի քանի այլ վայրերին։
Իրանը պատասխանել էր հրթիռային հարձակումներով։ Ավելի ուշ, ԱՄՆ-ը կիրակի վաղ առավոտյան ռմբակոծել էր Իրանի երեք միջուկային օբյեկտներ՝ պնդելով, որ դրանք ամբողջությամբ ոչնչացրել է։
Ի պատասխան, Իրանը երկուշաբթի երեկոյան հրթիռային հարվածներ էր հասցրել Կատարում գտնվող ԱՄՆ-ի Ալ Ուդեյդ ռազմաբազային։
Հրադադարը ուժի մեջ է մտել երեքշաբթի օրը՝ 04:00 GMT-ին, Թրամփի կոչով՝ երկու կողմերին խուսափել այն խախտելուց։
