ԱՄՆ-ի աջակցությամբ առաջարկված 60-օրյա հրադադարի ծրագիրը Իսրայելի և պաղեստինյան դիմադրության խմբի՝ Համասի միջև նախատեսում է պատանդների փուլային ազատում, Իսրայելի զորքերի դուրսբերում Գազայի որոշ հատվածներից և քննարկումներ՝ Գազայի պատերազմի դադարեցման շուրջ։ Այս մասին չորեքշաբթի հայտնել է բանակցություններին ծանոթ պաշտոնյան։
Ծրագիրը ենթակա է երկու կողմերի համաձայնությանը։
ԱՄՆ-ի, Կատարի և Եգիպտոսի միջնորդները աշխատում են համաձայնություն ապահովելու ուղղությամբ։ Ահա մանրամասները, որոնք ներկայացվել են պաշտոնյայի կողմից, ով խոսել է անանունության պայմանով Reuters լրատվական գործակալության հետ․
Պատանդներ և պաղեստինցի բանտարկյալներ
Ըստ ժամանակացույցի՝ 10 պատանդ կազատվեն, ինչպես նաև 18 պատանդների մարմինները կվերադարձվեն․
Օր 1․ 8 պատանդ
Օր 7․ 5 մարմին
Օր 30․ 5 մարմին
Օր 50․ 2 պատանդ
Օր 60․ 8 մարմին
Փոխանակումները կկատարվեն առանց որևէ արարողության կամ շքերթի։
Օր 10-ին Համասը կտրամադրի տեղեկություններ և ապացույցներ, որոնք կհաստատեն մնացած պատանդների կենդանի կամ մահացած լինելը, ինչպես նաև բժշկական հաշվետվություններ։
Իսրայելը կտրամադրի ամբողջական տեղեկություններ Գազայից հոկտեմբերի 7-ից հետո ձերբակալված պաղեստինցի բանտարկյալների մասին։
Համասը պատանդներ կազատի՝ Իսրայելի կողմից ձերբակալված պաղեստինցիների ազատման դիմաց։
Իսրայելը նշում է, որ Համասի և նրա դաշնակիցների կողմից պահվող 50 պատանդներից մոտ 20-ը համարվում են կենդանի։
Օգնություն պաղեստինցիներին
Հունվարի 19-ի համաձայնագրի համաձայն՝ օգնությունը անմիջապես կմտնի Գազա՝ բավարար քանակությամբ՝ ՄԱԿ-ի և Կարմիր խաչի միջազգային կոմիտեի մասնակցությամբ։
Իսրայելի դուրսբերումներ
Օր 1-ին, 8 պատանդների ազատումից հետո, իսրայելական բանակը դուրս կգա Գազայի հյուսիսային հատվածներից՝ համաձայնեցված քարտեզների հիման վրա։
Օր 7-ին, 5 մարմինների ստացումից հետո, իսրայելցիները դուրս կգան հարավային հատվածներից՝ համաձայնեցված քարտեզների հիման վրա։
Տեխնիկական խումբը կաշխատի սահմանազատման վրա՝ արագ բանակցությունների ընթացքում, որոնք տեղի կունենան առաջարկի շրջանակի համաձայնեցումից հետո։
Մշտական հրադադարի բանակցություններ
Համաձայնագրի առաջին օրը կսկսվեն մշտական հրադադարի շուրջ բանակցությունները։
Դրանք հիմնված կլինեն հիմնական կետերի վրա, որոնք ներառում են մնացած բանտարկյալների փոխանակում, Գազայի երկարաժամկետ անվտանգության պայմանավորվածություններ և մշտական հրադադարի հայտարարություն։
Եթե համաձայնություն ձեռք բերվի, Գազայից հոկտեմբերի 7-ից հետո ձերբակալված բոլոր պաղեստինցի բանտարկյալները կազատվեն։
Երաշխիքներ
Առաջարկը երաշխավորում է ԱՄՆ նախագահ Դոնալդ Թրամփի հանձնառությունը համաձայնագրին։ Եթե 60-օրյա հրադադարի ընթացքում բանակցությունները հաջող լինեն, դրանք կհանգեցնեն հակամարտության մշտական դադարեցմանը։
Միջնորդները կապահովեն, որ հրադադարի ընթացքում լուրջ բանակցություններ տեղի ունենան։ Եթե ավելի շատ ժամանակ պահանջվի, հնարավոր կլինի երկարաձգել այդ ժամանակահատվածը։
