ԱՄՆ հատուկ ներկայացուցիչ Սթիվեն Վիթկոֆֆն ու Դոնալդ Թրամփի ոչ պաշտոնական խորհրդական Ջարեդ Քուշները երկու շաբաթվա ընթացքում վեցերորդ հանդիպումն են ունեցել ուկրաինացի պաշտոնյաների հետ՝ քննարկելու Ռուսաստանի հետ պատերազմի ավարտի ուղղությամբ քայլերը, հաղորդում է Պետդեպարտամենտը։
Պետդեպարտամենտի բնորոշմամբ՝ այդ երկօրյա «կառուցողական» քննարկումներին մասնակցել են Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովն ու Գլխավոր շտաբի պետ Անդրեյ Հնատովը, և քննարկումները կենտրոնացած էին՝ «խթանել հուսալի ուղի՝ դեպի կայուն և արդար խաղաղություն Ուկրաինայում»։
Ումերովը վերահաստատել է, որ Ուկրաինայի առաջնահերթությունն է ձեռք բերել պայմանավորվածություն, որը «պաշտպանում է նրա անկախությունն ու ինքնիշխանությունը, երաշխավորում է ուկրաինացիների անվտանգությունը և ապահովում կայուն հիմք բարգավաճ, ժողովրդավարական ապագայի համար»։
Քննարկումներում նաև ընդգրկվել են Միացյալ Նահանգների վերջին հանդիպումների արդյունքները ռուսաստանյան պաշտոնյաների հետ և հնարավոր քայլերը, որոնք կարող են հանգեցնել հակամարտության ավարտին, որը այժմ մոտենում է իր չորրորդ տարուն։
Երկու կողմերը վերանայել են երկարաժամկետ խաղաղությունն աջակցող զսպման կարողությունները և համաձայնել են ապագա անվտանգության ապահովման շրջանակային մեխանիզմի շուրջ։
Վաշինգտոնը և Քիևը ընդգծել են, որ իրական առաջընթացը «կախված է Ռուսաստանի պատրաստակամությունից ցուցաբերել լուրջ նվիրվածություն երկարաժամկետ խաղաղությանը, այդ թվում՝ լարվածության նվազեցման ու սպանությունների դադարեցման ուղղությամբ քայլեր ձեռնարկելու»։
Կողմերը նախատեսում են շաբաթ օրը կրկին հանդիպել՝ բանակցությունները առաջ տանելու համար։
