Բալիմենայում և հարակից քաղաքներում արդեն երրորդ գիշեր շարունակվող բռնությունները խորացրել են ճգնաժամը։ Ապստամբները հարձակվել են ոստիկանների վրա, այրել մեքենաներ և թիրախավորել ներգաղթյալ համայնքները։
Անհանգստությունները սկսվել են այս շաբաթվա սկզբին, երբ երկու տեղացի դեռահաս տղաներ ձերբակալվել են ենթադրյալ սեռական ոտնձգության գործով։ Ամեն գիշեր իրավիճակը ավելի է սրվել։
Ոստիկանները ենթարկվել են շարունակական հարձակումների՝ բենզինային ռումբերով, աղյուսներով և հրավառություններով։ Ավելի քան 30 ոստիկան վիրավորվել է Բալիմենայում և հարակից քաղաքներում։ Մեքենաներ են ոչնչացվել, ներգաղթյալ ընտանիքներ ստիպված են եղել լքել իրենց տները, իսկ բիզնեսները փակվել են՝ հետագա հարձակումներից խուսափելու համար։
Մինչդեռ Լարնում դիմակավորված երիտասարդները հարձակվել են Լարնի ժամանցի կենտրոնի վրա։ Շենքի պատուհանները կոտրվել են, իսկ ներսում հրդեհներ են առաջացել։ Սոցիալական ցանցերում ավելի վաղ կեղծ տեղեկություններ էին տարածվել, թե Բալիմենայից տեղահանված ներգաղթյալները ժամանակավորապես տեղավորվել են այնտեղ։ Հասկանալի է, որ հարձակման պահին շենքում ոչ ոք չի եղել։
«Կազմակերպված ռասիստական բռնություն»
Ներգաղթյալ համայնքները, հատկապես Ֆիլիպիններից և Արևելյան Եվրոպայից, հայտնել են սպառնալիքների, վանդալիզմի և տեղահանման մասին։ Որոշ ընտանիքներ փակել են իրենց տները կամ ցուցադրել իրենց ազգային դրոշները՝ հարձակումներից խուսափելու համար։ Մի ֆիլիպինյան ընտանիք ստիպված է եղել մնալ տանը, երբ նրանց մեքենան այրվել է։
Անհանգստությունները սկսվել են այն բանից հետո, երբ Բալիմենայի Կլոնավոն Թերաս շրջանում հունիսի 7-ին ենթադրյալ սեռական ոտնձգության գործով ձերբակալվել են երկու 14-ամյա տեղացի տղաներ։ Չնայած ոստիկանությունը հաստատել է, որ կասկածյալները տեղացիներ են, առցանց տարածված ապատեղեկատվությունը հրահրել է ռասիստական բռնություններ։
Մամուլի ասուլիսում ոստիկանության օգնական գլխավոր կոմիսար Ռայան Հենդերսոնը նշել է, որ իշխանությունները դեռ ուսումնասիրում են բռնությունների բնույթը։ «Այս պահին մեզ համար պարզ չէ՝ կա արդյոք պարամիլիտար խմբերի համակարգում այս ամենում»,- ասել է Հենդերսոնը՝ անդրադառնալով երկրում դեռ ակտիվ գործող ստվերային զինված խմբերին, որոնք կապված են կաթոլիկ ազգայնականների և բողոքական միութենականների միջև նախկինում եղած հակամարտությունների հետ։
Ոստիկանությունը այժմ վերանայում է տեսահսկման կադրերը և քննարկում է Բրիտանիայից լրացուցիչ ուժերի ներգրավումը։ Բռնությունները տարածվել են Բալիմենայից դուրս՝ ներառյալ Նյուտաոնաբի, Քարիքֆերգուս և Քոլրեյն քաղաքները, որտեղ կիրառվել են անկարգությունների վերահսկման միջոցառումներ։
Հյուսիսային Իռլանդիայի առաջին նախարար Միշել Օ’Նիլը և փոխնախարար Էմմա Լիթլ-Փենգելլին համատեղ դատապարտել են հարձակումները՝ դրանք անվանելով «կազմակերպված ռասիստական բռնություն»։ Մեծ Բրիտանիայի վարչապետ Քիեր Սթարմերը նույնպես կոչ է արել հանգստություն պահպանել և աջակցել արդարադատության գործընթացին։
Հայտարարվել է, որ Հյուսիսային Իռլանդիայի քարտուղար Հիլարի Բեննը պլանավորում է այցելել Բալիմենա՝ իրավիճակը տեղում գնահատելու համար։
Համայնքային խմբերը և հասարակական առաջնորդները աշխատում են աջակցել տեղահանված ընտանիքներին և մեղմել լարվածությունը, քանի որ տարածաշրջանը շարունակում է մնալ լարված։
