Գերմանական լրատվամիջոցների՝ ոստիկանությանը հղում անելով, հաղորդում են, որ մեկ մարդ զոհվել է, իսկ ավելի քան 10-ը՝ վիրավորվել, երբ Բեռլինի կենտրոնում շքերթի ժամանակ մեքենան մխրճվել է ամբոխի մեջ։
Դեպքը տեղի է ունեցել շաբաթ օրը՝ տեղական ժամանակով մոտավորապես ժամը 22:00-ին, Տիրգարտեն շրջանում շքերթի ժամանակ։
Ոստիկանությունն ու շտապօգնության աշխատակիցները դեպքի վայրում օգնություն են ցուցաբերել վիրավորներին, սակայն նրանց վիճակի մասին մանրամասն տեղեկություններ չեն հրապարակվել։
Կազմակերպիչները շքերթը դադարեցրել են տարածքում ոստիկանության և արտակարգ ծառայությունների միջամտությունից հետո։
BILD թերթը, հղում անելով ականատեսներին, հաղորդել է, որ սպիտակ միկրոավտոբուս մեծ արագությամբ մխրճվել է ամբոխի մեջ։
Դեպքից հետո ահազանգ է ստացվել բազմաթիվ վիրավորների մասին։ Հրշեջ ծառայության խոսնակը հայտարարել է, որ դեպքի վայր է ուղարկվել 44 արտակարգ իրավիճակների աշխատակից։
Տարածք են ուղարկվել նաև բազմաթիվ ոստիկաններ, և իշխանությունները խնդրել են քաղաքացիներին լքել միջոցառման տարածքը և հետևել արտակարգ ծառայությունների հրահանգներին։
Վարորդի կամ միջադեպի պատճառի վերաբերյալ այլ մանրամասներ դեռևս չեն հրապարակվել։
