Վրաստանի վարչապետ Իրակլի Կոբախիձեն կիրակի օրը հայտարարեց, որ նախագահական պալատ մտնել փորձող ցուցարարները փորձել են տապալել կառավարությունը և մեղադրեց Եվրամիությանը վրացական քաղաքականությանը միջամտելու մեջ։
Վրացական հատուկ նշանակության ոստիկանությունը պղպեղի սփրեյ և ջրցան մեքենաներ է օգտագործել ցուցարարներին նախագահական պալատից հեռացնելու համար և շաբաթ օրը ձերբակալել է հինգ ակտիվիստի, երբ ընդդիմությունը տեղական ինքնակառավարման մարմինների ընտրությունների օրը մեծ ցույց էր կազմակերպել։
Կոբախիձեն ասաց, որ հանրահավաքին մասնակցել է մինչև 7000 մարդ, սակայն նրանց «սահմանադրական կարգը տապալելու փորձը» ձախողվել է՝ չնայած ԵՄ-ի աջակցությանը։
«Նրանք անցան գործողությունների, սկսեցին տապալման փորձը, այն ձախողվեց, ապա սկսեցին հեռանալ դրանից։ Ոչ ոք չի խուսափի պատասխանատվությունից։ Սա ներառում է նաև քաղաքական պատասխանատվությունը», - վարչապետին մեջբերեց վրացական «Interpress» լրատվական գործակալությունը։
Նա մեղադրեց ԵՄ դեսպան Պավել Հերչինսկուն վրացական քաղաքականությանը միջամտելու մեջ և կոչ արեց նրան դատապարտել բողոքի ցույցերը։
«Դուք գիտեք, որ արտասահմանից որոշակի անձինք նույնիսկ ուղղակի աջակցություն են հայտնել այս ամենին, սահմանադրական կարգը տապալելու հայտարարված փորձին։ Այս համատեքստում Վրաստանում Եվրամիության դեսպանը կրում է հատուկ պատասխանատվություն։ Նա պետք է դուրս գա, հեռանա և խստորեն դատապարտի Թբիլիսիի փողոցներում տեղի ունեցող ամեն ինչ», - ասաց Կոբախիձեն։
ԵՄ-ից անմիջապես մեկնաբանություն չի եղել այդ պնդումների վերաբերյալ, սակայն հուլիսին ԵՄ դիվանագիտական ծառայությունը մերժել է այն, ինչն անվանել է «ապատեղեկատվություն և անհիմն մեղադրանքներ» Վրաստանի իշխանությունների կողմից Վրաստանում ԵՄ-ի ենթադրյալ դերի վերաբերյալ։
Իշխող «Վրացական երազանք» կուսակցությունը շաբաթ օրը հայտարարեց, որ հաղթանակ է տարել Հարավային Կովկասի 3.7 միլիոն բնակչություն ունեցող երկրի բոլոր համայնքներում՝ երկու խոշորագույն ընդդիմադիր դաշինքների կողմից բոյկոտված ընտրություններում։
