ԱՄՆ նախագահ Դոնալդ Թրամփը նոր վերջնագիր է ներկայացրել Թեհրանին՝ հայտարարելով, որ կա՛մ համաձայնության կգան Իրանի հետ, կա՛մ ռազմական ճանապարհով «կոչնչացնեն» այդ երկիրը։
Ամերիկյան Fox News հեռուստաալիքին տված հարցազրույցում նախագահ Թրամփը գնահատական է տվել ԱՄՆ արտաքին քաղաքականությանը՝ նոյեմբերի 3-ին կայանալիք Կոնգրեսի միջանկյալ ընտրությունների նախաշեմին։
Պնդելով, որ Իրանի հետ հակամարտության ընթացքում հասել են այն ամենին, ինչին ձգտում էին՝ Թրամփը հայտարարեց, որ նրանք «ոչնչացրել են» Թեհրանի կարողությունները՝ հատկապես ռազմական և տնտեսական ոլորտներում։
Իրանի վերաբերյալ իր պահանջների ցանկին ավելացնելով ևս մեկ վերջնագիր՝ Թրամփը նշեց. «Արդյո՞ք պետք է գործարք կնքեմ նրանց հետ, թե՞ պետք է ոչնչացնեմ նրանց։ Սա է միակ հարցը»։
Պնդելով, որ Միացյալ Նահանգները լիակատար վերահսկողություն ունի Հորմուզի նեղուցի նկատմամբ՝ ԱՄՆ նախագահը հայտարարեց, որ իրենք ապահովել են նեղուցով նավթի հոսքի շարունակումը նախապատերազմյան մակարդակներով։
«Հիշե՛ք, այժմ մենք ենք վերահսկում Հորմուզի նեղուցը։ Նրանք ոչինչ չեն ստանում, իսկ մենք ստանում ենք ամեն ինչ», — ասաց Թրամփը՝ հավելելով, որ Իրանի դեմ սահմանված ծովային շրջափակումը շարունակում է մնալ չափազանց արդյունավետ։
