Գերմանիայի կառավարությունը նախատեսում է չորեքշաբթի օրը ներկայացնել համապարփակ բարեփոխում, որը երկրի հետախուզական ծառայություններին կշնորհի լայն լիազորություններ՝ թույլ տալով նրանց իրականացնել գաղտնի գործողություններ և միջոցներ ձեռնարկել արտաքին սպառնալիքների դեմ։
Մի քանի ամիս շարունակ քննարկվող բարեփոխումները կմեղմեն այն խիստ կանոնները, որոնք Գերմանիայի հետախուզական ծառայությունների գործունեությունը մեծ մասամբ սահմանափակում են միայն հետախուզական տվյալների հավաքագրմամբ և զեկույցների ներկայացմամբ։
Կանցլեր Ֆրիդրիխ Մերցի կոալիցիան պնդում է, որ հետախուզական ծառայությունների հզորացումն անհրաժեշտ է՝ հակազդելու թշնամական օտարերկրյա պետությունների, ինչպես նաև ահաբեկչական կազմակերպությունների և կիբերհանցագործների կողմից ստեղծվող սպառնալիքներին։
Գերմանացի պաշտոնյաները Մոսկվային մեղադրում են երկրի դեմ «հիբրիդային» արշավ վարելու մեջ, որը ներառում է դիվերսիաներ, լրտեսություն և ապատեղեկատվություն, քանի որ Գերմանիան Ռուսաստանի դեմ պատերազմում Ուկրաինայի խոշորագույն ռազմական աջակիցներից է։
Խորհրդարանի՝ հետախուզության գործունեության վերահսկողության հանձնաժողովի նախագահ Մարկ Հենրիխմանը AFP-ին հայտնել է. «Մենք ներգրավված ենք ինտենսիվ հիբրիդային հակամարտության մեջ ոչ միայն Ռուսաստանի, այլև այլ դերակատարների հետ»։ Նա հավելել է. «Ուստի մեր հետախուզական ծառայությունները պետք է համընթաց քայլեն ժամանակի պահանջներին և մեկ քայլ առաջ անցնեն»։
Հենրիխմանը պնդում էր, որ Գերմանիայի զգուշավոր մոտեցումը երկրին «հետ է մղել» և զրկել այն եվրոպական անվտանգության գործում պատշաճ ներդրում ունենալու հնարավորությունից։
Հենրիխմանն ընդգծեց փոփոխությունների կարևորությունը՝ մատնանշելով մի շարք միջադեպեր, օրինակ՝ անցյալ շաբաթ Լայպցիգի օդանավակայանում պայթուցիկով բեռնված անօդաչու թռչող սարքի հայտնաբերումը։
«Մենք բախվում ենք հակառակորդների, որոնք ոչ մի կանոն չեն ճանաչում,- ասաց նա։ - Նրանք չեն հարգում օրենքն ու կարգուկանոնը։ Նրանց նպատակը ոչ թե պարզապես Արևմուտքի, ԵՄ-ի և Գերմանիայի վրա ճնշում գործադրելն է, այլ՝ իդեալական դեպքում, նրանց ծնկի բերելը»։
