ՄԱԿ-ի Գլխավոր ասամբլեան երեքշաբթի օրը ընդունեց բանաձև, որը կոչ էր անում Ուկրաինայում համապարփակ, արդար և երկարատև խաղաղության: Ռուսաստանը քվեարկեց բանաձևի դեմ, իսկ Միացյալ Նահանգները ձեռնպահ մնաց:
Որոշումն ընդունվեց 107 կողմ, 12 դեմ և 51 ձեռնպահ ձայների հարաբերակցությամբ։
Ուկրաինայի կողմից ներկայացված և 46 երկրների կողմից աջակցվող բանաձևը ընդգծում էր պատերազմի տարածաշրջանային և գլոբալ հետևանքները՝ արտահայտելով «լուրջ մտահոգություն» Ռուսաստանի կողմից քաղաքացիական բնակչության, քաղաքացիական թիրախների և կարևորագույն էներգետիկ ենթակառուցվածքների վրա շարունակական հարձակումների, ինչպես նաև մարդասիրական իրավիճակի վատթարացման վերաբերյալ։
Բանաձևը վերահաստատեց Գլխավոր ասամբլեայի անսասան հանձնառությունը Ուկրաինայի ինքնիշխանությանը, անկախությանը, միասնությանը և տարածքային ամբողջականությանը, այդ թվում՝ նրա տարածքային ջրերին։
Բանաձևի նախագծում, որը կոչ էր անում «անհապաղ, ամբողջական և անվերապահ հրադադարի», նաև պահանջվում էր «որպես վստահության ամրապնդման հիմնական միջոցառումներ՝ ռազմագերիների լիարժեք փոխանակում, անօրինական կերպով կալանավորված բոլոր անձանց ազատ արձակում և բռնի տեղահանված կամ վտարված քաղաքացիական անձանց, այդ թվում՝ երեխաների վերադարձ»։
Միևնույն ժամանակ, ԱՄՆ-ն առաջարկ ներկայացրեց բանաձևի մի մասը մնացածից առանձնացնելու և այն այլ քվեարկության ենթարկելու մասին։
Ուկրաինայի արտաքին գործերի փոխնախարար Մարիանա Բետսան կտրականապես դեմ է արտահայտվել առաջարկին՝ այն որակելով որպես «խորապես մտահոգիչ և անընդունելի»։
ՄԱԿ-ում ԱՄՆ ներկայացուցիչ Թեմի Բրյուսը նշել է. «Մեր կարծիքով, բանաձևի նախագծում որոշ ձևակերպումներ, հավանաբար, կշեղեն ուշադրությունը ընթացող բանակցություններից, այլ ոչ թե կխրախուսեն բոլոր դիվանագիտական ուղիների քննարկումը, որոնք կարող են ճանապարհ հարթել դեպի երկարատև խաղաղություն»։
