ԱՄՆ նախագահ Դոնալդ Թրամփը զգուշացրել է Իսրայելին Իրանի վրա ռմբակոծություն չիրականացնել՝ այն որակելով որպես զինադադարի համաձայնագրի «լուրջ խախտում»։

«ԻՍՐԱՅԵԼ։ ՄԻ՛ ԳՑԵՔ ԱՅԴ ՌՈՒՄԲԵՐԸ։ ԵԹԵ ԴԱ ԱՆԵՔ, ԴԱ ԼՈՒՐՋ ԽԱԽՏՈՒՄ Է։ ՎԵՐԱԴԱՐՁՐԵՔ ՁԵՐ ՕԴԱՉՈՒՆԵՐԻՆ ՏՈՒՆ, ՀԻՄԱ՛»,- երեքշաբթի օրը գրել է Թրամփը իր Truth Social սոցիալական հարթակում։

Սպիտակ տնից հեռանալիս նա նաև ասել է, որ Իսրայելը պետք է հանգստանա։

«Ես պետք է Իսրայելին հանգստացնեմ հիմա։ Իսրայելը, հենց որ մենք պայմանավորվածություն ձեռք բերեցինք, դուրս եկավ և ռումբեր նետեց, որի նմանը ես երբեք չեմ տեսել, ամենամեծ քանակությունը, որ մենք երբևէ տեսել ենք»,- ասել է նա։

Նա նաև ասել է, որ Իսրայելն ու Իրանը «չգիտեն, թե ինչ են անում»։

«12-ՕՐՅԱ ՊԱՏԵՐԱԶՄ»

Հունիսի 13-ից սկսած՝ Իսրայելը հարվածներ է հասցրել Իրանի միջուկային օբյեկտներին և մի շարք այլ վայրերի՝ պնդելով, որ Թեհրանը մոտ է միջուկային զենք ստանալուն։

Իրանը, որը հերքում է միջուկային զենքի ծրագրի առկայությունը, պատասխանել է հրթիռային հարվածներով։

Հետագայում ԱՄՆ-ը ռմբակոծել է Իրանի երեք հիմնական միջուկային օբյեկտները՝ Ֆորդոն, Նաթանզը և Իսֆահանը կիրակի օրը։ Թրամփը հայտարարել է, որ հարվածները «լիովին և ամբողջությամբ ոչնչացրել են» այդ օբյեկտները։

Իրանի պատասխան հարվածը Քաթարում գտնվող ԱՄՆ-ի Ալ Ուդեյդ ռազմաբազային եղել է երկուշաբթի երեկոյան, սակայն լուրջ վնասներ կամ զոհեր չեն եղել, և հետագա համաձայնագիրը դրեց «12-ՕՐՅԱ ՊԱՏԵՐԱԶՄԻ» վերջակետը։

Զինադադարը սկզբնապես հայտարարվել է Թրամփի կողմից, ով ասել է, որ այն կներառի գործողությունների փուլային դադարեցում, որտեղ Իրանը կսկսի զինադադարը առաջինը, իսկ Իսրայելը կհետևի 12 ժամ անց։ Թշնամական գործողությունների լիակատար ավարտը կհայտարարվի 24-րդ ժամին։

Իսրայելական լրատվամիջոցները հաղորդել են, որ Քաթարը միջնորդել է համաձայնագիրը։