ԱՄՆ դաշնային դատարանի դատավորը հրաժարվել է մերժել Վենեսուելայի պաշտոնանկ արված նախագահ Նիկոլաս Մադուրոյի դեմ թմրանյութերի ահաբեկչության մեղադրանքը, որը հունվարին գերի էր վերցվել ամերիկյան ուժերի կողմից և բանտարկվել ԱՄՆ-ում։
Մադուրոյի պաշտպանությունը խնդրել էր կարճել գործը՝ հիմնվելով այն բանի վրա, որ ԱՄՆ պատժամիջոցները թույլ չեն տալիս Վենեսուելայի կառավարությանը վճարել Մադուրոյի և նրա կնոջ՝ Սիլիա Ֆլորեսի դատական ծախսերը։
Ավագ դատավոր Ալվին Հելլերշտեյնը մեկ ժամից ավելի տևած լսումների ժամանակ ասել է, որ առայժմ չի կարճի գործը՝ կասկածի տակ դնելով Թրամփի վարչակազմի որոշումը՝ շարունակել խոչընդոտել Կարակասին վճարել ծախսերը, հատկապես այն պատճառով, որ Մադուրոյի առևանգումից հետո հարաբերությունները ջերմացել են։
Հելլերշտեյնը պնդում էր, որ Մադուրոյի իրավաբանական թիմին Վենեսուելայի կառավարությունից ֆինանսավորում ստանալուն խոչընդոտելը կարող է խախտել նախագահի սահմանադրական իրավունքը՝ իրավաբանական խորհրդատվություն ստանալու համար: Մադուրոն և նրա կինը հայտարարել էին, որ իրենք չունեն իրավաբանական ծախսերը հոգալու համար անհրաժեշտ անձնական միջոցներ։
Մեղադրողները փորձել էին պաշտպանել շարունակական արգելքը՝ պնդելով, որ զույգը կարող է օգտվել հանրային խորհրդատվությունից, սակայն Հելլերշտեյնը կասկածանքով էր վերաբերվում այս փաստարկին՝ ասելով, որ դա կարող է լրջորեն սպառել նրանց ռեսուրսները, ովքեր իրավական պաշտպանության այլ տարբերակ չունեն։
ABC News-ի հաղորդմամբ, դատավոր Հելլերշտեյնը նշել է, որ Մադուրոյին պաշտպանելը կլինի «մեծ ծախս» և լրջորեն կսպառի հանրային պաշտպանների համար նախատեսված միջոցները։
Դատավորը ակնարկել է, որ կարող է վերանայել գործը չկարճելու իր որոշումը, եթե հետագայում որոշի, որ Թրամփի վարչակազմը կամայականորեն խոչընդոտել է Մադուրոյին վճարել իր իրավաբանական ծախսերը։
Հելլերշտեյնն ասել է, որ շուտով որոշում կկայացնի, որը կպարտադրի Թրամփի վարչակազմին թույլատրել Վենեսուելայի կառավարությանը հոգալ դատական ծախսերը, սակայն պարզ չէ, թե երբ կկայացվի այդ որոշումը։ Լսումների ամսաթիվը դեռևս նշանակված չէ։
Լրացուցիչ մեղադրանքներ
ԱՄՆ նախագահ Դոնալդ Թրամփը հայտարարել է, որ Մադուրոյի դեմ կարող են լրացուցիչ մեղադրանքներ առաջադրվել։
«Նա դատարկեց իր բանտերը Վենեսուելայում, դատարկեց իր բանտերը մեր երկրում։ Եվ ես հույս ունեմ, որ այդ մեղադրանքը որոշ պահի կներկայացվի, քանի որ դա մեծ մեղադրանք է, որը դեռ չի առաջադրվել, այն պետք է առաջադրվի», - ասել է Թրամփը Սպիտակ տանը կայացած կաբինետի նիստում։
Թրամփն ասել է, որ Մադուրոն ԱՄՆ մտնող թմրանյութերի «հիմնական մատակարարն» է։
Թրամփն ասել է, որ Մադուրոն կստանա «արդար դատավարություն»՝ առանց մանրամասներ հաղորդելու հավելելով. «Բայց կարծում եմ, որ կլինեն հետագա դատավարություններ»։
Լսումները երկրորդն էին Մադուրոյի և Ֆլորեսի առևանգումից հետո։
