Երկուշաբթի երեկոյան Ճապոնիայում տեղի ունեցած 7.4 մագնիտուդով երկրաշարժից հետո ցունամիի ալիքներ են դիտվել երկրի հյուսիսային և հյուսիսարևելյան մասերում։

ԱՄՆ երկրաբանական ծառայության տվյալներով՝ ժամը 07:52-ին Գրինվիչի ժամանակով գրանցված երկրաշարժի էպիկենտրոնը գտնվել է Իվատե պրեֆեկտուրայի Միյակո քաղաքից մոտավորապես 114 կիլոմետր հեռավորության վրա։

Ճապոնիայի կառավարությունը գրանցել է 7.5 մագնիտուդ և ցունամիի մասին նախազգուշացում է տվել Խաղաղ օվկիանոսի ափերի երկայնքով՝ Հոկայդո, Աոմորի և Իվատե շրջաններում։

Կառավարության հայտարարության մեջ նշվում է, որ «Ափամերձ կամ գետային տարածքներում գտնվողները պետք է անհապաղ տարհանվեն բարձրադիր և անվտանգ տարածքներ»։

Kyodo News-ի տվյալներով՝ ցունամիի ալիքներ են դիտվել Խաղաղ օվկիանոսի Իվատե և Աոմորի պրեֆեկտուրաների ափերի մոտ։

Իշխանությունները զգուշացրել են, որ ցունամիների բարձրությունը կարող է հասնել մինչև երեք մետրի, սակայն նշել են, որ Աոմորի և Միյագի պրեֆեկտուրաների ատոմակայաններում «որևէ աննորմալություն չի գրանցվել»։

Երկրաշարժից հետո դադարեցվել է մայրաքաղաք Տոկիոյի և Աոմորի պրեֆեկտուրայի միջև արագընթաց գնացքների երթևեկությունը։

Վարչապետ Սանաե Տակաիչին կոչ է արել տուժած տարածքներում բնակվող քաղաքացիներին «գնալ ավելի բարձր վայրեր» հնարավոր ցունամիի դեպքում։

Երկրաշարժի հետևանքով վնասների մասին տեղեկություններ չեն հաղորդվել։