Մերձավոր Արևելքում լարվածության աճի պայմաններում, Կանադայում կայացած Մեծ յոթնյակների առաջնորդները հայտարարեցին, որ Իրանը երբեք միջուկային զենք չի ունենա։
«Իրանը տարածաշրջանային անկայունության և ահաբեկչության հիմնական աղբյուրն է», - ասվում է Կանադայի, Ֆրանսիայի, Գերմանիայի, Իտալիայի, Ճապոնիայի, Միացյալ Թագավորության և Միացյալ Նահանգների առաջնորդների հայտարարության մեջ։
«Մենք միշտ հստակեցրել ենք, որ Իրանը երբեք չի կարող միջուկային զենք ունենալ», - հավելել են նրանք։
Վերահաստատելով իրենց նվիրվածությունը Մերձավոր Արևելքում խաղաղության և կայունության ապահովմանը՝ նրանք նշեցին. «Այս համատեքստում մենք հաստատում ենք, որ Իսրայելն ունի ինքնապաշտպանության իրավունք։ Մենք վերահաստատում ենք մեր աջակցությունը Իսրայելի անվտանգության համար»։
Նրանք նաև ընդգծեցին խաղաղ բնակչության պաշտպանության կարևորությունը։
«Մենք կոչ ենք անում, որ Իրանի ճգնաժամի լուծումը հանգեցնի Մերձավոր Արևելքում թշնամությունների լայնածավալ նվազեցմանը, ներառյալ հրադադարի հաստատումը Գազայում», - ասացին նրանք։
Առաջնորդները հայտարարեցին, որ շարունակելու են «զգոն մնալ» միջազգային էներգետիկ շուկաների վրա ազդեցությունների նկատմամբ և պատրաստ են համակարգել գործողությունները՝ շուկայի կայունությունը պահպանելու համար։
ԱՄՆ նախագահ Դոնալդ Թրամփը երկուշաբթի ավելի ուշ կվերադառնա Վաշինգտոն՝ ավարտելով իր մասնակցությունը G7 գագաթնաժողովին՝ Մերձավոր Արևելքում լարվածության պատճառով։
«Ես պետք է շուտ վերադառնամ՝ ակնհայտ պատճառներով», - ասաց նա լրագրողներին։
Ավելի վաղ Թրամփը կոչ արեց խաղաղ բնակիչներին անհապաղ լքել Թեհրանը՝ Իսրայելի և Իրանի միջև աճող լարվածության պայմաններում։
«Իրանը պետք է ստորագրեր այն «համաձայնագիրը», որը ես առաջարկեցի։ Ինչպիսի ամոթ և մարդկային կյանքերի կորուստ։ Պարզ ասած՝ ԻՐԱՆԸ ՉԻ ԿԱՐՈՂ ՈՒՆԵՆԱԼ ՄԻՋՈՒԿԱՅԻՆ ԶԵՆՔ։ Ես դա ասել եմ բազմիցս։
«Բոլորը պետք է անհապաղ լքեն Թեհրանը», - գրել է նա իր Truth Social հարթակում։
Լարվածությունը սրվել է ուրբաթ օրվանից, երբ Իսրայելը համակարգված օդային հարվածներ և անօդաչու սարքերի հարձակումներ է իրականացրել Իրանի մի քանի վայրերում, ներառյալ ռազմական և միջուկային օբյեկտները, ինչը ստիպեց Թեհրանին պատասխան հարվածներ հասցնել։
