Հարավկորեական պաշտպանական հսկա Hanwha Aerospace Co.-ն երկուշաբթի օրը հայտարարեց, որ նախատեսում է ընդլայնել իր դերը որպես երկարաժամկետ անվտանգության գործընկեր Սկանդինավյան տարածաշրջանում՝ անցյալ շաբաթ Նորվեգիային հեռահար հրթիռային համակարգեր մատակարարելու համաձայնագրից հետո։

Yonhap լրատվական գործակալության փոխանցմամբ՝ ընկերության նախագահ և գործադիր տնօրեն Սոն Ջաե-իլը նշել է, որ Նորվեգիայի կողմից Hanwha Aerospace-ի Chunmoo բազմակի արձակման համակարգի (MRLS) ընտրությունը արտացոլում է նախկինում մատակարարված K9 ինքնագնաց հաուբիցների նկատմամբ ձևավորված վստահությունը։

Սոնը հավելել է. «Մենք հանձնառու ենք Նորվեգիայի հետ սերտ համագործակցության միջոցով նպաստել Սկանդինավյան տարածաշրջանի երկարաժամկետ անվտանգությանը՝ շարունակելով ամրապնդել մեր դերը որպես ռազմավարական անվտանգության գործընկեր»։ Նորվեգիայի պաշտպանական նյութերի գործակալության (NDMA) հետ կնքված պայմանագրի համաձայն՝ Hanwha Aerospace-ը Նորվեգիայի զինված ուժերին կմատակարարի 16 Chunmoo MRLS միավոր, ճշգրիտ կառավարվող հրթիռների փաթեթ և ինտեգրված լոգիստիկ աջակցություն։

Մոտավորապես 2 միլիարդ դոլար արժողությամբ գործարքը հաջորդում է Hanwha Aerospace-ի և նորվեգական զինված ուժերի միջև գրեթե տասը տարվա համագործակցությանը, որը սկսվել է 2017 թվականին՝ նորվեգական բանակի կողմից 52 K9 Vidar ինքնագնաց հաուբից և 14 K10 զինամթերքի փոխադրման մեքենա գնելով։

Ընկերությունը նաև պլանավորում է ամրապնդել իր համագործակցությունը նորվեգական արդյունաբերության հետ՝ համատեղ մշակման և տեղական փորձարկումների միջոցով։